La resolución del Tribunal Constitucional avalando l´emplegu del asturianu nes rellaciones cola Alministración, ye un fechu de gran importancia pal presente y´l futuru de la nuestra llingua. Hai que ver, en primer llugar, cómo se produxo esi fechu, pues curiosamente, nun fue´l funcionariu afectáu, don Xurde Blanco, el que lo presentó al altu tribunal depués de dalgún fallu na so contra, sinón que fue´l propiu titular del xulgáu de lo Contencioso Alministrativo, de xuro nun escesu de «celo», el que lo fizo. Yo, al marxen del llinguax tapecíu de la «cosa» xurídica, desplicaríalo asina: Xurde Blanco, presenta un escritu ante l´Alministración pidiendo un permisu por enfermedá. Ésta nun lu almite por tar n´asturianu y l´ abogáu llevalos a xuiciu. Pero l’ínclitu señor xuez del Xulgáu de lo Contencioso Alministrativo diz: «¿Ah, sí? ¿O seya que queréis llevar eso pola via llegal, eh? Pues voi davos yo per onde más vos duel. Como too esto ye un cuentu, nun sólo nun te lo aceuto sinón que voi chivame al mio primu de Zumosol pa que vos diga qu’esa pretendida llei na que queréis sofitavos, ye inconstitucional, porque podría ser un camín hacia la oficialidá. Asina que, ¡ehí va!»
Como vemos agora, el tiru salió-y pela culata. Y abúltame que’l Gobiernu Asturianu y los grupos parllamentarios d’oposición, deben tar alcordándose de su santa madre por metelos nesti enguedeyu. Porque, por más que quieran dicinos agora qu’esto nun cambia nada, la verdá ye que sí cambia. Cambia un par de coses sustanciales:
La primera que dalgo que «nos concedíen» casique de favor, agora tienen la obligación llegal de facelo. Anque nosotros tábemos convencíos de lo que dicía la llei, daba la impresión que lo cumplíen porque queríen, non porque teníen. Bien, pues yá sabemos, y ellos tamién, que tán obligaos a facelo. Y la segunda ye de tipu inmaterial, pero de la mesma fondura: adquirimos l’arguyu de que, la nuestra llingua, al igual que les oficiales, pue emplegase pa dirixise a los poderes públicos. Pasamos de ser siervos a ser ciudadanos. Lo cual nun ye poco.
Otramiente, ye curiosa la reaición de la xente ante esti fallu del Constitucional. La primer declaración del Gobiernu Asturianu (que yo conoza), fue la de la Direutora de Política Llingüística, Consuelo Vega. Ella diz, y yo créola, que-y paez «positivu», anque llueu, en declaraciones posteriores, confúndelo con otres coses. Y la segunda, la de la Conseyera Migoya, namás que fue un puru «cantinfléu» de «sí pero non, non pero sí», ensin aportar nada. En tou casu da la impresión que’l gobiernu quedó «tocáu», quiciás polo inesperao del fechu. Y ye que paez una batalla que perdió nel camín, llargu camín, que va a llevar hasta la oficialidá. Por si acasu, notables periodistes políticos, como Juan Neira, apresúrense a dicir que nun hai problema, que tamos en bones manes: «El Psoe y el PP son partidos muy asturianos y profundamente españoles. Los principales líderes políticos (Álvarez Areces, Javier Fernández, Ovidio Sánchez) no han realizado concesiones demagógicas hacia las minorías y siempre han sido muy prudentes para no herir la identidad colectiva». ¡Manda güevos! Del Psoe y del PP podrán dicise munches coses, pero que seyan mui asturianos… ¡home que nun fadien! ¿En qué, son asturianos? ¿Na política mediuambiental? ¿Na proteición del Patrimoniu Material ya Inmaterial? ¿Na defensa de les señes d’identidá? ¿Qué ye eso de «nun ferir la identidá coleutiva», si ye lo único que saben facer, ferila? En cuantes a les mayoríes y les minoríes volver a dici-yos a toos ellos, políticos y periodistes, qu’una cosa son les mayoríes parllamentaries y otra les sociales, y que nun siempre van xuntes. Una cosa ye que nun seyamos a articular un partíu políticu qu’entre nel parllamentu, y otra que nun esista a favor de la llingua un consensu abondu ampliu en favor de la oficialidá, como lo dicen toles encuestes feches hasta agora, por cierto, por encargu de los socesivos gobiernos de turnu. Y por último, y anque fuere lo contrario, ¿por qué les concesiones hacia les minoríes, propies de tou país civilizáu (los emigrantes, los diferentes…) tienen que ser demagógiques? ¿Por una vez, nun puen ser xustes?
Termino. Ta claro que la cosa mancó-yos. Por una vez l’enemigu, queriendo danos «caña», fízonos un favor. Nun hai qu’echar les campanes al vuelu, pero el poder dir dando pasinos alantre siempre ye un aliendu, nesti camín llargu y abegosu pol que llevamos tantos años transitando. ¡Ah! Y que sigan faciéndonos favores…
