Sé que dalgún va a quexase pola comparanza, pero la fras nun ye mía. Vien nun «vinilu» triple que tengo de Los Brincos -un discu antolóxicu dicho en tolos sentíos- desplicando la so importancia nel mundu del «pop» español de los 60. Ya igual ye verdá. Los Brincos yeren un grupín «suave», al llau de grupos «fuertes» como Lone Star o Los Bravos. Talo que, a la so vez, los Beatles yeren un grupín suave al llau de, por exemplu, los Rolling.
En cualquier casu, a mi yera un grupu que me prestaba, quiciás porque nel so día (a primeros de los 60) crearon un soníu propiu, peculiar, estremáu de lo qu’había. Con ellos principió’l fenómenu de los y les «Fans», y acaparaben el mercáu de superventes que, claro, nun yera lo que vieno depués. Tratábase de dalgo más modesto. Con ellos, y colos tocadiscos «de maleta», entamábemos los «guateques» (una pallabra que paez que vien d’otra galaxia nel tiempu) nos que, a la escontra de lo que pasa agora, el que «pinchaba los discos» siempre yera’l más fatu o el que menos «lligaba».
Los que más fama teníen dientro’l grupu yeren Juan Pardo y Junior Morales, lo que de xuro influyó en que, en plenu
ésitu, decidieren separtase y formar el dúu «Juan y Junior». Tuvieron unos añinos d’ésitu, pero ya taben camudaos n’almibar puru. Repunaben a les piedres. Pa min, el verdaderu celebru de la banda fue Fernando Arbex. Suyes fueron les canciones más diferentes y menos amaneraes: «Mejor», «Lola», «Oh, mama», «A mí con esas», «Amiga mía»… Les canciones que los ficieron famosos más allá de les pequeñes fronteres. Pero taba pernidio que, ensin los dos «divos», el grupu nun tenía futuru, anque entovía dieron dalgún «barrenazu» como «Un sorbito de champán». Fue’l so «cantu del cisne».
Vien too esto a cuentu del recién fallecimientu de Junior. El probe pasó a la pequeña historia social como «el maríu de la Durcal». Ye dafechamente inxusto. El tamién fue un divu. Quiciás nel so tiempu (un tiempu vieyu) más grande que la propia Rocío. Pero tuvo la mala suerte de nun morrer un poco primero. Agora sería más recordáu.
