Acaba fallase’l Premiu Príncipe d’Asturies de Ciencies Sociales y el gallardón fue a parar a una filósofa norteamericana de nome Martha Nussbaum. De xuro que la señora Nussbaum tendrá méritos abondos p’algamar esi premiu, cosa que nun podemos evaluar los que nunca oyimos falar d’ella. Dicen que tien un «curriculum» estraordinariu y nun seré yo quien lo niegue. Pero lo que sí sé, y sabemos munches persones n’Asturies y fuera d’ella ye que a esti premiu optaba tamién l’ equipu d’investigadores de la Cueva del Sidrón, al mandu del arqueólogu y profesor de la Universidá d’Uviéu, Marco de la Rasilla. Un equipu de prestixu internacional que cuenta nes sos files con xente como’l paleoantropólogu Antonio Rosas, el xenetista Carles Lalueza-Fox o el paleoxenetista Svante Pääbo del Institutu d’Antropoloxía Evolutiva Max Planck d’Alemania. Xunto con otros espertos de les Universidaes d’Uviéu y de Barcelona.
Esti multidisciplinar equipu científicu ta trabayando nel estudiu del primer borrador del xenoma Neanderthal, un de los
mayores llogros científicos nel conocimientu de la evolución humana. El trabayu na cueva d’El Sidrón, en Piloña, ye un exemplu pioneru con un prestixu internacional de primer orde. Pero, amás de los importantísimos aspeutos científicos, El Sidrón pue suponer un polu de desarrollu pa una zona d’Asturies que bien necesitada ta d’ello. Dende esi puntu de vista, hai que destacar que’l Principáu y Caxastur roblaron n’agostu pasáu dos convenios de collaboración pa desarrollar la futura Casa de los Neanderthales, na finca de Las Huelgas, lo que de xuro traería pal nuestru País un interés nun sólo científicu, sinón tamién social y turísticu.
Pero paez ser qu’esto nun interesó muncho al xuráu que falló’l premiu. Un premiu que ya l’añu pasáu se-y dio a otru norteamericanu, que seguro que ye muncho más «cosmopolita». Y ye que siguimos emperraos en negar lo nuestro y abrazar cualquier cosa que venga de fuera, anque lo nuestro tenga tantos o más méritos que l’otro. Ye lo que siempre pasa n’Asturies. Lo bono ye lo de los otros, lo nuestro, ya sabemos, sigue siendo la «cultura de la madreña». Pues voi permitime dici-yos al xuráu del Premiu Principe d’Asturies de Ciencies Sociales, nel que tamién había dalgún «asturianista», una cosina: «Los aldeanos son ustedes.»
