Falleció Miguel Montes, una institución nel nuestru Sporting. Un xugador que nun tuvo’l carisma d’otros de los que se fala más, quiciás porque la época que pilló nun fue la del mayor rellumu del equipu. Vilu xugar munches veces, porque yera’l tiempu nel que yo yera sociu y avezaba a dir al Molinón. Años escuros, nos que se lluchaba por facelo bien en Segunda División cola vista puesta nuna Primera que nos pillaba mui lloñe. Tan malos años yeren que l’equipu descendió a Tercera, onde nun llegó a xugar pola renuncia d’un equipu (creo que’l Condal de Barcelona) lo que motivó un tornéu en Mallorca colos equipos implicaos pol descensu. Ganó’l Sporting (gracies a la moneda d’Ortiz) y caltuvimos la categoría. Montes yera un de los que xugó esi tornéu. Principió xugando d’estremu derechu y yera veloz, con ciertu desborde, pero sobre too yera un futbolista entregáu, xenerosu, pundonorosu. D’esos que n’Asturies llamamos «sangrín». Como marcaba golucos y, hasta que llegó Solabarrieta, tábemos escosos d’ellos, pasáronlu a delanteru centru que creo que nun yera’l so puestu, porque faltába-y talla y tarrén pa aprovechar la so velocidá.
Tuvo munchos años nel Sporting. LLeí que yera’l xugador que más partidos disputare en Segunda, más de 200, lo que tien de ser tou un record. Fiel a los sos colores finó, ensin embargu, la so vida deportiva nel eternu rival: el Real Oviedo, tal y como-y pasó tamién a otru de la so quinta, Biempica. Llueu fízose entrenador y, tres pasar por munchos equipos, recaló en Mareo onde cumplió delles tarées, inclusive como entrenador del primer equipu. Xugador honráu, d’esos que se llamen «d’equipu», llamento la so perda polos años que lu vi xugar y por tratase d’una bona persona. Descanse en paz l’afanosu xugador del Sporting.
(Na semeya, Montes ye’l segundu pela izquierda de los d’abaxo. Ente Biempica y Ortiz)
