Como quiera qu’avezo a da-yos bastante «caña» a los del Partíu Popular, sobre too a dalgunos mal llamaos «responsables» (siéntolo, nun soi a evitalo): Gobiernu, Esperanzona, los valencianos trapicheros… etc. etc. creo que ye de xusticia que, cuando al mio modestu talantar, faen dalgo que ta bien-yos lo reconoza. Asina asocede con esa xornada añal que convoca la estaya de la muyer del PP de Xixón, esti añu empobinada a la Cultura y a la Llingua asturianes. Pol salón d’actos del Antiguu Institutu, pasaron pa charrar o aldericar coles muyeres del PP xixonés xente de tantu valir como Berto Álvarez Peña (cada día más sabiu), Ana Cano, Xosé Antón González Riaño y otra xente rellacionao col cine o la lliteratura del nuestru País. Asistí a un de los actos (el del «sabiu») y fui a comprobar el fondu respetu col que participaron y la muezca que-yos fizo’l sentir falar, n’asturianu, de la nuestra etnografía y de la riqueza del Patrimoniu Inmaterial que tenemos los ástures. Les pallabres pronunciaes pola Presidenta del partíu en Xixón, y que recoyó con amplitú la prensa, suponen un posicionamientu favoratible a una
Cultura Asturiana, na que s’inclui la llingua, a la que ta dispuesta a sofitar. De xuro que con doña Pilar Fdez. Pardo taré en desalcuerdu en munchísimes coses, y voi siguir tándolo, pero hai que reconoce-y que de los dirixentes de los partíos estatalistes que trabayen n’Asturies, ye la más comprometida en defensa de les nuestres señes d’identidá. Sé qu’eso nun ye la Oficialidá, pero tamién sé qu’esa Oficialidá tien que dase nun Parllamentu nel que participen, con gran mayoría, esos grandes partíos estatales. Y cualquier pasín que sirva p’afondar nel tema, ye positivu. Y que nun vengan los «radicales de chigre» a dicir que too eso ye pa «piescar» votos. Porque, por desgracia, a estes altures, el nuestru caladeru tien mui pocos pexes.
