Díxose siempre que lo meyor cuando se firma un pautu, cuando se llega a un alcuerdu ente dos o más partes, ye que naide quede contentu. Polo menos non del too. Eso ye una señal de que nengún ganó penriba del otru y, poro, que tampoco naide perdió dafechu. Si dalgún queda del too satisfechu ye que l’otru o los otros nun lo quedaron, y l’alcuerdu non durará muncho. Paez que la sentencia qu’acaba conocese sobre’l tema del denomáu «procés» nun dexó a naide contentu del too. Unos dicen que ye suave y otros que demasiao fuerte. Apliquemos, pues, lo dicho enantes: de xuro que ye una bona sentencia.
Tuve’l santu humor de siguir munches de les xornaes del xuiciu en direuto, a traviés d’una ventana qu’abría El País coneutada cola sala del Supremu. Tengo de confesar que lo fici un poco por morbo, pero fundamentalmente por nun perdeme l’actuación del xuez Marchena que me prestó pola vida. Siento lleva-y la contraria a un de los mios fíos al que nun-y gustó nada. A min paecióme que controlar como lo fizo él aquel «maremagnum» de procesaos, fiscales, abogaos defensores y testigos tien un méritu descomanáu. Porque, amás, caún diba a soltar el so «rollito primavera» a favor o en contra d’unos o otros. Que’l xuiciu llegare a bon puertu fue méritu principalmente suyu, resueltu con firmeza, conocimientu de la llei y un ciertu sentíu del humor mui suyu. Pa más aquello, agora llogró que la sentencia fuere firmada por unanimidá, lo que la refuerza entovía más, ensin eses incorporaciones individuales a les que puedan acoyese les partes pa posteriores recursos. Bien, pues, por Marchena.
Llóxicamente, y al rodiu de lo que dicía al empiezu, a min tamién hai coses de la sentencia que non me gusten. Sobre too una na que toi en total desacuerdu. Ye cuando se diz que tolo que ficieron los condenaos fue como «de broma». Una engañifa pa presionar al gobiernu y conseguir el famosu referendum: «Un artificio engañoso». Yo non me lo creo. Nun se llega tan alantre, de farol, pa presionar al Estáu. Quiciás sí lo del referendum chapuceru que se fizo, pero lo demás, les anulaciones de les lleis y la declaración solemne de la independencia (recordemos aquel vidiu de los alcaldes independentistes colos bastones de mando nes escaleres del Parlament) abúltame que diba de verdá. Lo que pasó ye que detrás nun había nada. Yera un meru decoráu que, cuando les fuerces polítiques del estáu dieron lluz verde al 155, esbarrumbó como un castiellu d’arena al xubir la marea. Pero la impresión qu’a min me dio ye que nun yeren actores representando un papel, sinón políticos mui verdes que nun teníen un Plan B pa depués de la Declaración Unilateral d’Independencia. Pero, en fin, esto entra dientro de la teoría de «¿naide contentu? Toos contentos».
Y ¿agora qué? cabría entrugase nesti momentu. Como dicen los italianos: «Chi lo sa». Quién lo sabe. Hai un balagar grande de posibilidaes, anque a la fin la cosa va volver a cómo taba enantes: una sociedá, la catalana, dividida en dos partes asemeyaes ya irreconciliables, y al tiempu, dividida tamién col restu del Estáu Español. Primero habrá, claro, los famosos «disturbios» va tiempu anunciaos, les pomposes declaraciones d’unos y otros y llueu too tornará a esi puntu d’equilibriu inestable que paez nun tener solución. Eso sí, con unes eleiciones pente medies que dalgo podríen camudar. Veremos.
