Morrió con 91 años y una hestoria que podría dar pa facer una película. Aurora Molina yera fía de dos importantes anarquistes allugaos en Barcelona: Juan Manuel Molina y Lola Iturbe. Juanel, como se lu conocía polos compañeros de militancia, fue activista del grupu anarquista «Germen», Secretariu Peninsular de la FAI y direutor de Tierra y Libertad y de Tiempos Nuevos. Nos años de la guerra civil encargóse, como subsecretariu, de la Conseyería de Defensa de la Generalitat (hasta los abegosos socesos de mayu del 37), y fue comisariu del XI y del X Cuerpu d’exércitu hasta la cayída de Cataluña. Marchó pa Francia mui a última hora y ellí, demientres ocupaba’l cargu de Secretariu de la CNT, trabayó cola resistencia escontra los nazis. Too esto ta recoyío, y muncho meyor cuntao, nel so llibru Noche sobre España, editáu pola so nieta y amiga nuestra Dalia -Dalia Álvarez Molina-, profesora na Universidá d’Uviéu. Un llibru escritu en diverses cárceles españoles, ente 1946 y 1954, asoleyáu per primer vegada en México (1958) y reeditáu, como digo, nel 2011 pola amiga Dalia. La so muyer «la amada compañera de toda la vida» -llámala nes sos memories- Lola Iturbe, fue una de les componentes del grupu feminista «Mujeres libres», y destacó nunos tiempos nos que les muyeres avezaben a xugar otros «roles».
De la xunión d’estos dos anarquistes importantes, ñacieron dos fíos: Aurora, a la que güei despidimos, y el so hermanu Helenio, yá fallecíu. Aurora vivió, primero xunto a sos pás y llueu, yá d’adulta en solitario, la dureza d’aquellos años cola firmeza y el comencimientu que los verdaderos llibertarios lo facíen. Nada que ver con esos «cantamañanes» que, de xemes en cuando, afirmen nos periódicos, porque piensen que «viste» muncho, qu’ellos son «llibertarios». Eso, amiguinos, hai que se lo ganar a lo llargo d’una vida, y cuesta abondo. Como dicia’l xeográfu francés Elisée Reclus, miembru de la Primer Internacional, en fras que se repitió muncho: «L’anarquía ye la másima espresión del orde, sofitada en coses naturales, ensin coacciones nin violencies». ´Coses de xente serio, con una conducta exemplar no personal y no público. Aurora conoció nel esiliu francés a Ramón Álvarez Palomo. Dambos yeren viudos y con fíes, y decidieron xuntar les sos vides. De Ramón poco hai que dicir que nun se sepa: anarcosindicalista y un de los personaxes más importantes de la Revolución del 34 (fue secretariu del Comité Revolucionariu de Xixón) y de la guerra civil n’Asturies (miembru del Conseyu Soberanu d’Asturies y Lleón que presidía Belarmino Tomás). Marchó pal esiliu a Francia y ellí conoció a Aurora.
Yo conocí a Ramón y Aurora, a la so vuelta del esiliu, nel añu 1977. Entós rexentaben una llibrería na Cai Cangues
d’Onís que se llamaba (¡como non!) «Llibrería Confederal». Queríen retirase porque yá yeren mayorinos, y como una llibrería siempre ye «escuru oxetu de deseyu», xuntámonos los cuatro amigos que yéremos Monchu Díaz, Amalia Trancho, Teresa González y yo, y coyimos el trespasu de la llibrería. Tuvímosla pocu tiempu, porque toos teníemos otros trabayos y yera complicao atendela, anque’l suficiente pa que, nuna Feria del Llibru en Begoña, nos tiraren los «fachas» (a la caseta) un cocktel Molotov. En cualquier casu, d’aquelles circunstancies nació la nuestra amistá con Ramón y Aurora. Él falleció va yá unos años -nel 2003- dexando tres de sí toa una vida empobinada al anarquismu y unos cuantos ya interesantes llibros (la so biografía d’Eleuterio Quintanilla ye de llectura obligada) y agora, once años depués, faílo la so compañera del alma Aurora. Esti día tuvimos Amalia y yo dándo-yos un abrazu grande a los sos fíos, Dalia y Floreal, y aprovecho esti momentu delantre l’ordenador pa recordar toes estes coses que nos xuníen a ellos y a sos pás. Que la tierra-y seya leve a l’amiga Aurora Molina y que a la fin descanse de tantos avatares.
