Constituyóse esti día un nuevu Parllamentu surdíu de les urnes. Los españoles escoyimos a los que queremos que nos representen y falen nel nuestru nome, na magna institución que recueye la voz del pueblu. Bueno, esto ye la teoría y lo que tenemos de valorar nuna democracia. Llueu vien Paco cola rebaxa, y el filtru de los Partíos Políticos ente la nuestra voz y lo qu’ellí se defende cambia bastante les coses. Tamos nuna «partitocracia». Pero, en fin, como siempre se diz, ye’l menos malu de los sistemes.
Total qu’ayeri vimos cares nueves pela Carrera de San Jerónimo. Cares, pintes, xuramentos y otres coses pintoresques. Munches muyeres, lo cuál paezme mui bien, porque entiendo que nun ye por eso de la paridá de sexos nes llistes, sinón porque tienen una valía personal que les fai merecedores d’ello. Tamién xente mozo, baxando la edá media de los diputaos a unos cuarenta y pocos años. Digo lo mesmo. Ye bueno que les nueves xeneraciones s’incorporen a tarees llexislatives sustituyendo a esos «carcamales» que se repiten añu tres añu nunos aburríos escaños a los que nun aporten nada. El casu paradigmaticu ye’l Senáu, órganu inútil, refugium pecatorum, onde atopamos a xente como la Carcedo, el Areces, el Goñi, y otros vieyos dinosaurios que van a morrer ensin nenguna dignidá con sueldos pagaos por toos nosotros.
Paecióme d’una superficialidá pergrande l’anéudota del neñu de la Bescansa, que debió quedar bien «bescansada». Y ye que non too val pa «chupar cámara» y algamar protagonismu. Tenía ónde y con quién dexalu, y la supuesta reivindicación feminista nun se tien en pie. Hai que da-y un poco de seriedá a la Cámara y non pue valir too. Si lu tuviere llevao un paisano tovía podría tener dalguna gracia la cosa. Agora tamos en manes de la prósima ocurrencia que tenga cualquier grupu del Congresu pa llamar l’atención.
Tampoco nun me gustó la formulina de xurar o prometer el cargu, caún con un estribillu propiu que daba a aquello
una sensación de poca seriedá. ¿Qué ye eso de xurar la Constitución pa llueu cambiala? Eso, más qu’un xuramentu, ye una declaración d’intenciones. De momentu, tienes que xurar la Constitución, que ye un requisitu imprescindible y conocíu pa cualquiera que se presente a les eleiciones. Y si nun te gusta, yá trabayarás nel futuru pa cambiala, nun hai porque anticipalo nel xuramentu. En cualquier casu, agradézo-yos a los dos representantes asturianos de Podemos que lo ficieren n’asturianu, anque metieren eso de los güelos y los fíos, y la xente… como si fuere una proclama en vez d’un xuramentu. Lo que llueu vaigan a facer, yá lo diremos viendo, tiempu van tener pa ello.
Tamién habría que cuidiar un poco l’aspeutu, que dalgunos paecía que diben pidiendo llimosna. Home, yo nun digo qu’haya que dir de corbata, o de gala, pero un poco curiosinos sí, porque nun yes sólo una persona individual, que viste como quier, sinón que representes a un importante coleutivu y hai que dir con una cierta dignidá. Y yá pa finar y nun resultar pesáu, nun sé qué demonios pintaben nel Parllamentu español los partíos que nun quieren ser españoles y que rompieron con España. Nun se pue tar na procesión y tocando les campanes. Si nun quieren ser españoles xenial, pero entós ellí nun pinten nada. Nun van gobernar lo suyo y lo nuestro. Vamos, digo yo. En fin, esto nun ta más qu’empezando. A ver cómo sigue, porque agora queda lo más gordo: gobernar.
