Les anuncies que nos lleguen dende’l llamáu «cuernu d’África» son, cada vuelta, más esmolecedores. Decenes de miles de somalíes, fuxen de la fame y de la guerra buscando abellugu na capital, Mogadiscio, y nos paises vecinos. La gran seca d’esti añu (pero tolos años ye lo mesmo), y la especulación de los mercaos internacionales traxo un aumentu descomanáu nos precios de los alimentos. Y 20 años d’una guerra absurda acaben de rematar (nunca meyor dicho) a una población desnutrida a la que’l desplazamientu en cata d’una meyor situación-y produz entovía más desnutrición.
Yá dixi n’otres ocasiones que la comunidá internacional nun pue mirar pa otru llau. Nun ye sólo un problema de caridá, sinón de xusticia. Pero habría que dir entovía un pasu más alantre. Nun abastaría con da-yos de comer a esos millones de famientos, lo cuál yá sedría muncho, sinón qu’habríen de ponese los medios pa que, nel futuru, eso nun volviere a asoceder. Pa que los somalíes, y toos esos otros pueblos que tán como ellos, nun coman pescáu, sinón qu’adeprendan a pescar. Eso pasaría por dotalos d’unes
infraestructures suficientes pa qu’aniciaren el desarrollu. ´Habría que facer carreteres, pozos d’agua potable qu’ellos pudieren controlar, escueles onde poder mandar a los neños pa que nel futuru haya una xeneración de gobernantes democráticos, hospitales onde poder curase d’enfermedaes que n’otros llugares yá tan esaniciaes… Tou un programa de reconstruición nacional pa los qu’habría que da-yos recursos. Y lo curioso ye que los estudios yá tan fechos. Yá hai unos planes llistos pa poner en marcha qu’aseguraríen el futuru d’estos probes paises masacraos. El problema ye que nun hai perres pa ponelos en marcha. Hailes pa especular, pa forrase los bolsiellos, pero pa que dexe de morrer xente y pueda tener un futuru viable, pa eso non. Dacuando a un éntren-y ganes de refugar del xéneru humanu.
