La carta de cuatro eurodiputaos, tres catalanes (PSC, CIU, ICV) y una gallega (BNG), pidiendo una «intervención preventiva» de la Comunidá Europea, poles amenaces del emplegu de «la fuerza militar contra la población catalana», paecería propio d’una película de Berlanga si nun fuere una cosa demasiao seria pa tomala a coña. Nun momentu tan delicáu pal futuru del Estáu Español como nel que tamos, con unes fuertes tensiones independentistes en Cataluña y el País Vascu, xugar agora al aprendiz de bruxu mentando la posibilidá d’un golpe militar paezme, cuando menos, una insensatez.
Ta claro que la situación actual esmolez a muncha xente, seguro qu’ente ellos a cures, obispos, militares ensin graduación y con ella. Pero derivar d’ello la posibilidá de que l’exércitu pudiere, al so llibre albedríu, emplegar la fuerza militar escontra la población catalana ye, amás de dar pábulo a unos comentarios babayos, abrir un debate que pa nada va a beneficiar nin a los independentistes catalanes, nin a los que camienten una Cataluña dientro d’España. Al exércitu hai que lu dexar onde ta: nos cuarteles o n’aquelles misiones que les Cortes Españoles-y dean nel estranxeru. Yá tuvimos abondu exércitu metíu en política durante cuarenta años.
A lo llargo d’estos meses, o quiciás años, en qu’estos temes del futuru ordenamientu del Estáu tean en discutiniu ( y el
casu, anque aceleráu nestes caberes selmanes, nun ye nuevu), hai qu’estremar la prudencia peles partes y llegar a unes soluciones, les que fueren, de mou ordenáu y civilizáu. Poro, cualquier imprudencia que pudiere dar pie a que les coses nun fueren per esa carril, hai que la rechazar dafechu. Más, cuando vien per parte d’unos políticos que debieren collaborar a que les coses nun s’engafentaren. Si lo que pretendíen yera salir al pasu d’unes declaraciones d’esi políticu del PP, que ye don Alejo Vidal Cuadras, personaxe por demás esperpénticu, nun facía falta toa esa «parafernalia» d’unviar cartes a la Comunidá Europea, introduciendo nun debate políticu internu, na menos qu’ al exércitu. Abastaba con una carta a la direición del periódicu. A lo que paez, dalgunos d’esos cuatro firmantes (Romeva, de ICV y Tremosa, de Ciu) yá tuvieron otres intervenciones mui pintoresques cara a la Comunidá Europea, como cuando denunciaron el famosu pisotón de Pepe a Messi, nun partíu Madrid-Barsa. Aquello quedó n’eso, una cosa pintoresca que depués tuvieron que retirar. Pero esto ye muncho más grave y nun hai qu’andar xugando con fueu porque podemos quemanos. Asina que a ver si nun hai más incontinencia verbal o escrita sobre’l tema, porque los políticos tán pa intentar solucionar los problemes, nun pa crealos.
