Hasta na política, la cucia y cruenta política, hai unes ciertes cortesíes a la hora de facer les crítiques a los detentadores del poder. A los que tomen decisiones que nos cinquen y que nun nos agraden. Una d’elles ye esa de dar un marxe de 100 díes enantes de cargar les armes dialéctiques escontra lo que nos fadia o nun nos presta. Dicho lo cuál, voi a saltame esa cortesía porque quiero meteme cola alcaldesa de Xixón y dame igual que lleve los 100 díes o non.
Díxilo por activa y por pasiva, enantes, durante y depués de les eleiciones llocales. Ehí tán les entrades nesti blogue pal que quiera comprobalo. Y lo que dixi fue qu’esta señora que manda nel mio pueblu nun tien talla nin categoría pa desendolcar el puestu d’alcaldesa. Fue un desastrín como Conseyera d’Educación y Cultura del Principáu, cargu que tamién llevaba lo de Política Llingüística, y prémienla nomándola pa dirixir una ciudá que nun ye la suya y pa un cargu pal que tampoco nun ta preparada. Salió alcaldesa aprovechando’l tirón de Pedro Sánchez, como hubiere salío don Tancredo si lu ponen el primeru de la llista del PSOE. Y ye que les actuaciones que ta teniendo hasta agora, nesos más/ menos 100 díes, confirmen los peores badagüeyos que teníemos. Nin conoz Xixón, nin conoz a los xixoneses, nin tien capacidá política nenguna.
Nel llamáu Plan de Víes, cuando yá la Corporación anterior tenía les coses bien iguaes y les promeses feches por Fomento puestes negro sobre blanco, vuelven a da-y llargues al asuntu con nueves esixencies burocrátiques. En vez de plantase con puxu y encabezar una actuación de les fuerces vives de Xixón, corporación incluida, agacha la tiesta ante Madrid y da unes cuantes disculpes pa facer de parachoques. Y ye qu’esti ye un tema que ya fiede y nel que-y cuelga muncho a la nuestra ciudá. Yá ta bien de retrasos y mentires.
Cuando l’anterior ayuntamientu presentó la batalla pa llograr pa Xixón el Grau de Deportes, asuntu que taba nel aleru, ella fai unes declaraciones babayes diciendo poco menos que nun-y importa muncho’l tema, que prefier que les instalaciones deportives les esfruten los xixoneses. Dexando’l pasu llibre a la Universidá y al Principáu pa llevar el Grau pa Mieres. Fracasu seguru. Un campus artificial fechu a mayor gloria de los Fondos Mineros y al que naide quier dir. Mieres necesitaría otru tipu de proyeutos pa salir del fondón. Agora, y pa esconder la so actuación vergonzante nesti tema, saca un “hat trick” de la chistera pidiendo un grau de Belles Artes, como gran idea suya, cuando yá Avilés y Uviéu taben preparando les sos propuestes. Nuevu enfrentamientu ciudadanu. Y voi pasar por alto otres cuantes pifies y faltes de tactu, en temes como’l Festival del Arcu Atlánticu que, tando too organizao, dixo que nun valía pa nada y diba a suprimilo porque ñaciere pa sostituyir a la Selmana Negra, o l’anunciu del cese de Divertia, encargada de les fiestas y otres actuaciones importantes, xusto en mediu del branu. Que yo sepa, y sé muncho, hasta esti momentu nun dio una en blancu. Debieron regala-y una escopeta d’eses de la feria col puntu de mira virolu. Y voi dexalo equí porque nun tengo más espaciu y porque eso de los cien díes de tregua ye una cosa mui seria. Anque yo nun cumpla con ella.
