ARMES Y DERECHOS HUMANOS.- Hai munchos paises, munchos, qu’alendaron y cellebraron como cosa propia los llevantamientos populares escontra les dictadures d’Oriente Mediu. Poner fin a una riestra años de dictadura y dar posibilidá a que los pueblos seyan a gobernase democraticamente paez, cada vuelta más, un avance perimportante. Pero munchos d’esos paises qu’alienden la democracia, siguen alendando, tamién, la venta d’armes a paises con gobiernos autoritarios o dictatoriales. En Bahrein, Amnistía Internacional identificó botes de gas llacrimóxenu y bales de goma duro, emplegaes escontra’l pueblu, d’orixen norteamericanu y, tamién, granades franceses. En Libia, les fuerces de seguridá empleguen vehículos blindaos fechos polos británicos. Según AI, los paises que suministren armes a Baherein, Exiptu y Libia son: Alemania, Bélxica, Estaos Xuníos, Francia, Italia, Gran Bretaña… Nestos momentos ta negociándose na ONU un Tratáu sobre’l Comerciu d’Armes. Ellí deberín incluyise, tamién, les utilizaes poles fuerces de seguridá y la policía. Porque eses armes puen emplegase, d’igual mou, pa entamar graves violaciones de los Derechos Humanos.
ESTAOS XUNÍOS DE NORTEAMÉRICA: CARA Y CRUZ.- La cara ye que’l movimientu de los «indignaos», que lleva
tiempu trabayando nel llamáu Vieyu Mundu, yá dio’l saltu al Nuevu Mundu y amenacia con organizase permanentemente nos Estaos Xuníos. Nueva York y Washington son, ente otres poblaciones, testigos de la so protesta, fonderamente empobinada escontra los amos de Wall Street y los «tiburones» financieros. Una bona noticia que les babayaes d’Obama nun son a tapecer. Por contra, en distintos Estaos, siguen produciéndose «asesinatos llegales» de persones condenaes a la Pena de Muerte. Y dalgunes d’elles ensin les debíes garantíes llegales. Ye esi un andaz qu’habría d’esborrase de los códigos civiles de les sociedaes modernes. El primeru el d’esi país que tantes lleciones nos da de democracia.
EL NIEMEYER NECESITA UN PAUTU.- Paez ser qu’hai munchos intereses encontraos nel tema del Niemeyer. Intereses por facese col control del Centru Cultural. Ye esi un tema, quiciás, de mayor fondura que, como siempre, caerá del llau del que tenga más poder. Pero visto dende fuera, da la impresión de que’l tema sacóse «de madre». En cualquier sitiu qu’haya invertíes perres públiques, seyan munches o poques, les cuentes tienen que tar clares y los poderes públicos (al nivel que seyan: ayuntamientu, conceyu, comunidá autonómica, estáu…) tan obligaos a pidir tresparencia. Poro, los avilesinos deberín ser los primeros interesaos en que les cuentes del Niemeyer fueren clares. Esixir eso nun ye dir escontra naide, sinón a favor de toos. Naide quier quita-yos nada, pero «el burru polo que cuesta». Y toa esa historia de «Estrenos Mundiales», y de famosos que vienen y van ensin saber pa qué, hai que la revisar. Somos una comunidá pequeña y bastante probe. Dexemos el «glamour» pa los que puedan pagalu. La cultura n’Asturies tien de ser otra cosa, y los tiempos que cuerren nun tán pa despilfarros. Lo mesmo digo pal Centru Cultural Universidá Llaboral, que ye otru «sacaperres» ensin fondu. Y esto nun tien nada que ver con que les «formes» con qu’actuó’l Gobiernín de Cascos fueren les más afayaíces. Que nun lo fueron.
