¡QUE SE H.ODAN!.- Nun ye esta la primer vez qu’esi verbu tan castizu, anque malsonante, suena nes muries del Parllamentu. Cuéntase, anque nun sé si sedrá una d’eses «lleendes urbanes», que cuando Camilo José Cela yera Senador por aciu del Rei, el Presidente de les Cortes llamó-y l’atención alegando que taba «dormíu». A lo que l’escritor contestó: «Nun toi dormíu, toi dormiendo, que nun ye lo mesmo. Como nun ye lo mesmo tar h.odíu, que tar h.odiendo». Claro, qu’ al personaxe que yera Cela podía consentíse-y l’exabruptu, pero a una pelamangos como a esa Fabra, nun ye sólo que suene mal, ye que lleva al recostín una ideoloxía facha, prepotente y clasista. Podríemos dicir, ensin empachu, que «de tal palu tal estilla», pero igual ye un recursu mui fácil porque nun tolos fíos tienen qu’heredar los defeutos de los padres. Pero si yo fuere un de los que diz representar esa señora (por llamala de dalgún mou), nun tardaría nin un minutu en pidi-y la dimisión. Non por mal falada, sinón por miserable.
LA «UNO» NUN FUNCIONA.- Hasta qu’España entró na ONU, en 1955, los periódicos d’equí citaben al organismu
internacional poles sos sigles n’inglés: United Nations Organization. Recuérdolo porque nuna manifestación de les fuercies vives franquistes, que protestaben pola non almisión d’España nesa organización, había una pancarta que ponía: «Ellos tienen UNO, pero nosotros tenemos DOS», con esi casticismu facha que nun dexa de tener gracia. Pues bien, llámese como se llame, lo cierto ye que la cadarma que tien esi organismu qu’atropa a tolos paises del mundu, conviértela en dafechamente ineficaz. Refiérome, claro, al derechu al vetu que tienen nel Conseyu de Seguridá les cinco grandes potencies. Rusia, una d’elles, ta vetando sistemáticamente cualquier resolución escontra’l réxime asesinu de Siria, ya inclusive la imposición de sanciones. Ta claro: Rusia ye, precisamente, el principal suministrador d’armes al gobiernu siriu y, llóxicamente, nun quier perder el negociu. Lo de menos ye qu’eses armes sirvan p’ asesinar a gran parte d’esi mesmu pueblu, cuntando a muyeres y a neños. Nun cabe mayor cinismu. Por coses como esa, ún dexa de creyer que la ONU (o la UNO) sirva daveres pa dalgo.
25 AÑOS NEGROS.- Nun son los que nos esperen (que tamién) sinón los que pasaron. El cuartu de sieglu de la famosa, por tantes coses, Selmana Negra del amigu Taibo. Ya dexé clara n’otros sitios la mio opinión al rodiu de la Selmana Negra: un comederu pa los amigos de PIT II, que traxo a «tropecientos» colegues del otru llau del charcu, embaxo la catalogación d’ «escritores», y que cobró los sos bonos rendimientos a los llibreros que se instalaben y a los puestos de churros y lloteríes. Tamién ye verdá que, dacuando, traxo a dalgún bon escritor que, col so nome, abellugaba a tolos demás desconocíos qu’abeyaben peles carpes. Y tamién ye verdá qu’eso dio notoriedá na prensa que, o nun sabía de qué diba la cosa, o participaba de la llacuada. Sentí esti día quexase a Taibo de les perres que-yos daben, en comparanza con otros eventos. Ta buenu pa callar: ¿Cuántos miles d’euros y de pesetes dieron la Casa Conceyu y el Principáu a lo llargo d’estos 25 años al amigu Taibo y los de so? Mas esi tratu prefrerencial de tar tol día nes semeyes con Tini Areces, con Paz Felgueroso, colos distintos Conceyales de Cultura, etc. etc. Porfa, a estes altures de la película que nun se quexe. Ye de mui mal gustu.
