INTOLERABLE.- Les imáxenes d’un vidiu onde se ve a tropes españoles en Diwaniya (Irak), maltratando a güelpes y pataes a un prisioneru, pon los pelos de punta. Nun llega a un minutu, pero abasta pa que a ún se-y revuelvan les coraes. Nun importa que’l fechu se ficiere hai dalgunos años. Habrá que descubrir a los autores y a los sos cómplices (los mandos superiores, por saber o por nun saber, tendrán una responsabilidá) y castigalos como merecen. Dos entruges se planteguen agora al rodiu d’estos fechos: Primera, ¿trátase d’un casu aislláu o yera, más bien, dalgo corriente? Segunda, ¿qué coño pintamos nosotros n’Irak?
NUN SÓLO LOS POLÍTICOS.- Los políticos tienen muncha culpa de lo que ta pasando n’España. Esa ye la perceición que
tien la ciudadanía y de xuro que ye verdá. Pero munches veces los propios políticos nun son más qu’un reflexu de la sociedá na que ñacen y se desendolquen. O seya, de toos nosotros. Si ellos son corruptos, ye porque, en dala midida, la sociedá tamién lo ye. Nun son esceición. Como culpables son los ciudadanos de Ponferrada que, colos sos votos, caltienen nel gobiernu muncipal a un condenáu (¡güeyu, non acusáu, sinón condenáu…!) por «acosu sexual». Nun sólo eso, sinón que cunta con grupu municipal, lo cuál indica munchos votos. Qu’un «tipu» asina, en llugar de tar marxináu, nun sólo de la política, sinón de la propia vida social, tenga cargos nesa ciudá, fala mui mal de los conciudadanos que lu voten. Y equí la culpa nun ye de los políticos (que tamién)
EL QU’ATROPELLA QUE PAGUE.- Per muncho que diga o dexe de dicir la Guardia Civil, nel vidiu vese mui nidio cómo una llancha patrullera suya atropella a una patera enllena d’inmigrantes. Quiero creyer que la cosa nun fue a posta, y tratóse más bien d’un accidente. Pero, con eso y con too, pasa como nos accidentes de tráficu: el qu’atropella ye’l responsable. Ensin embargu da la impresión de que, como se trata d’ «ensin papelos», y naide los conoz nin los defende, val más la pallabra de la «xente d’orde», como los Civiles, que la d’esos «desarrapaos». Pues non. Toos son seres humanos y tienen los mesmos drechos que cualquier otru. Anque los probes tengan que xugase la vida por salir de la llaceria.
LOS GUARDIANES ¿DE QUÉ PARAÍSU?.- Hai una campaña institucional, con abondu despliegue de medios, que quier
vender la moto de facenos a toos «Guardianes del Paraíso». El problema ye qu’atalanten esi paraísu namás que como un marcu xeográficu. ¿Y ónde ta’l conteníu? Esi conteníu que debiere ser lo qu’enllena a la xeografía: Cultura, Llingua, Vezos, Tradiciones, Monumentos… Too eso a lo que nun se-y presta nengún sofitu. Como siempre quedámonos na superficie, en llugar d’afondar no que daveres ye’l migoyu del Paraísu: lo que ta dientro. Mientres esto asocede, víamos la imaxen del Grupu de Gaites «La Reina’l Truébano» desfilando solu pela Quinta Avenida de Nueva York. Ensin nenguna representación oficial, y ensin neguna axuda del País al que representen. Asina que meyor gastaben les perres en coses como esta, que n’esa propaganda vacía y grandona d’un Paraísu col que se-yos enllena la boca.
