UN AÑU DE NADA.- Cúmplese esti día un añu dende que la direición rexonal del PP, encabezada pola eterna perdedora que ye Mercedines Fernández, descabezó a la xunta llocal xixonesa que llideraba Pilar Fernández Pardo que, como cunta la historia, dimitó de resultes del «güelpe d’estáu» centralista. Dende entós, el partíu en Xixón ta más perdíu qu’aquel famosu cefalópodu qu’andaba dando vueltes per un garaxe. Como la famosa canción de Facundo Cabral: «Nin soi d’equí, nin soi d’allá». O dicho con un refrán asturianu, que los tenemos pa too: «Van colos de la feria y tornen colos del mercáu». Anque teníen que tener convocaes eleiciones nel plazu de seis meses, esa llamada Xunta Xestora, que nun «xesta» nada, sigui emperrada en llevar al partíu en Xixón de la probeza, a les más altes cotes de la miseria, dexando’l camín n’abertal pa que la otra derecha, la de Foro, atrope tol votu del votante conservador de la nuestra «villa marinera». La penúltima ocurrencia ye la de poner una Banderona Española pa que los xixoneses vaigamos a adorala. Eso sí que ye resolver los problemes del ciudadanu.
EL ROBU DE LA DEMOCRACIA.- Niégome a almitir que Democracia ye votar cada cuatro años a un de los partíos políticos
que se presenten, y llueu sentase colos brazos cruciaos a esperar poles prósimes eleiciones. Eso ye lo que quieren los poderes públicos y, peme que tamién, los que se llamen oposición. Porque, amás, esos representantes qu’escoyemos pa que discutan los nuestros problemes nel Parllamentu, ta cada día más nidio que nun representen a la ciudadanía, sinón a los sos propios intereses. Poro, ye de vergoña que se considere un trunfu de la democracia que tolos parllamentarios d’un grupu políticu, el PP, voten al empar la consigna que-yos da la direición del so grupu, ensin tener en cuenta la conciencia de caún. ¿O ye que nun la tienen? Eso ye lo que pasó na votación pa la retirada de la LLei del Albuertu, de Monseñor Gallardón, na que prevaleció una supuesta «unidá del partíu», enantes que los intereses d’una sociedá que yá nun sabe cómo facese oyer peles altes instancies del País. Lo que pue pasar ye que, si nun s’atopa a la Democracia dientro del Parllamentu, habrá que la buscar fuera.
LES «PELOTES» DEL MINISTRU DEL INTERIOR.- Pues paez que sí, que les Ongs y la xente que lo denunciaba teníen razón: la guardia civil disparó pelotes de goma escontra los inmigrantes que, con pelligru de la so vida, como se vio, pretendíen algamar tierra española. D’esi mou, el propiu Ministru del Interior desdixo al Direutor de la Guardia Civil que sopelexó xustamente lo contrario. Como pa fiate d’ellos. Y llueu, viendo como vimos a dalgunos d’ellos -de los inmigrantes- na playa de Ceuta, que se diga que los espulsaron, saltándose los protocolos, porque «xurídicamente» nun tuvieron en territoriu español. Eso ye favorecer los intereses marroquíes, porque da la impresión de que Ceuta nun ye España. Agora, lo que me toca un poco les narices ye que responsables de la Unión Europea, vengan diciendo que tán mui preocupaos polos socesos, cuando tán siempre mirando pa otru llau y-yos importa un pitu lo que-yos pase a los inmigrantes. Que nun tengan cara.
BEBA PEPSI-COLA.- Esos de la Coca-Cola tienen un «morru» que se lu pisen. Agora resulta que zarren, non porque tengan
pérdides, sinón porque los asturianos nun los merecemos. Nun nos necesiten. Pues, bien. Pues, val. Y nosotros a ellos tampoco. Si yo fuera hosteleru, pondría un lletreru bien grande nel mio negociu nel que tuviere llantao: «Equí nun servimos Coca-Cola, sólo tenemos Pepsi». Hai qu’avezase a facer patria, que nun ye dir a adorar a una banderona española, sinón lluchar pola promoción y venta de lo nuestro. Yo siempre que voi al Supermercáu compro agua mineral asturiana, y cuando voi a un chigre o restaurante y me ponen agua catalana, gallega o de casa su madre, pido que me la pongan de la nuestra. ¿Qué ye una babayada? Con babayaes asina ye como se fai País. Lo dicho: !Beba Pepsi-Cola!
