close
Olivando

Olivando

2009-12-14513Visitas

aminatuA VUELTES CON AMINATU HAIDAR.-

El gobiernu, col aquel d’amenguar la so responsabilidá nel casu de la valiente activista saharaui Aminatu Haidar, anda diciendo per tolos foros que lo que fizo fue dafechamente llegal, porque Aminatu tenía «permisu de residencia». Nesta murnia andadura, atopó agora’l sofitu de los sindicatos policiales, nuna xera corporativista abondo «impresentable». Al respeutu, namás voi dicir una cosa: Si a una persona-y quiten illegalmente la so documentación y la unvíen ESCONTRA LA SO VOLUNTÁ a otru país, reteniéndola ellí ensin devolve-y la documentación ¿cómo se llama a eso? ¿nun podemos emplegar la pallabra SECUESTRU? Porque, en tou casu, el permisu de residencia ye dalgo creao pa favorecer a esa persona, y que pueda voluntariamente usalu, pero nunca pa utilizalo na so contra. Y agora anden picando en toles puertes a ver quien-yos saca del fueu unes castañes que punxeron a amagostar ellos mesmos.

UN MURNIU FINAL.-2008-09-09_img_2008-09-02_09_56_11_juliana

En silenciu y pela puerta d’atrás, trancó l’actividá industrial l’Astilleru de Juliana quedando na cai’l caberu grupu de trabayadores del naval. Xixón, que llegó a tener cinco astilleros, queda yá ensin nengún. Yera la crónica d’una muerte anunciada cuando l’organismu estatal, la SEPI, en llugar de quedase con él, como fizo colos astilleros gallegos o andaluces, y reconvertilu pa siguir teniendo carga de trabayu, malvendiólu a manes d’unos particulares que nin podíen, nin sabíen, nin queríen facese cargu d’él. Los sindicatos confórmense con que la xente marche con cuatro euros en bolsu. Pero los puestos de trabayu (¡y cuántos van…!) queden amortizaos. ¿Que-yos vamos a dexar pa trabayar a los nuestros fíos? ¿Qué pasará cuando muerra esa xeneración que vive de pensiones y subsidios? Mete mieu.

mkl_obama_1_bm_baye_512851gOBAMA RECUEYE’L NOBEL DE LA PAZ.-

Daría la risa, sinón diere pena. A los pocos díes d’anunciar l’unvíu d’otros 30.000 militares a luchar a Afganistán, el presidente de la mayor potencia del mundu va a recoyer el premiu Nobel de la Paz. Dicen que fue mui sinceru, porque ellí defendió la «guerra xusta». Habría que s’entrugar quién ye’l que decide qué guerra ye xusta y cuála non. Porque, claro, les que promuevo yo son xustes, y les que promueven los otros nun lo son. Fue un militar el que dixo eso de «si busques la paz, prepárate pa la guerra», que ye’l mayor cinismu que se pue oyer nel mundu. Si’l «paradigma» de la llucha pola paz ye Gandhi, ¿qué tien que ver con esi mesmu conceutu Barak Obama? ¿En qué se paez a Gandhi? Un desprestixu más pa los premios Nobel. Anque ya-y lo tienen dao a Henry Kissinger, un de los mayores asesinos de la humanidá, que propició, ente otros munchos, el golpe d’estáu que valtió a Salvador Allende y punxo nel poder al criminal de Pinochet. Qué podíemos esperar. Mete mieu.

UNES LLECTURES NAVIDIEGUES.-

Pa que nun seya too tan ablayante, voi permitime recomendar unes llectures o unos regalos pa estes fiestes de navidá. Son llibros asturianos y n’asturianu, pero que tienen el mesmu altor que cualesquier d’otra llingua. Col añadíu de que, al mercalos, tamos faciendo «patria»:

Poesía: «La poesía lírica asturiana». Col. DEVA nº 30. Atenéu Obreru de Xixón.
Narrativa: «Xente tan cerca» Antón García. Edit. Ámbitu
Ensayu: «Aspeutos de la muerte n’Asturies» Roberto Glez.-Quevedo. Madú Ediciones.
Infantil: «Garulla. Antoloxía del ritmu. García Oliva y Severino Antuña (¡qué menos!) Ed. Trabe.