¡A VOTAR!.- Pues sí, paez que nun va haber más salida que volver dir camín de les urnes pa desatascar una situación que nunca debió llegar a producise. Como yá se dixo tanto sobre’l tema, y por xente muncho más ilustre que yo, nun voi repitir argumentos masuñaos. Dicir, namás, qu’a min nun me molesta volver a votar. Hailos qu’echen les manes a la cabeza por tener que votar tantes veces. Eso nun ye lo importante. Nos caberos cuatro años votamos cinco veces. Bueno, ¿y qué? ¿Tantu trabayu cuesta dir hasta la esquina y meter un papel nuna urna? Nun sé si será porque tuvi 40 años ensin poder facelo que, agora que puedo, nun m’importa volver de xemes en cuando a exercitar el mio derechu. Eso nun ye lo malo. Lo malo ye la situación que s’entamó, anque nun hubiéremos votao nos últimos cinco años. Y ye malo porque amuesa una fonda incapacidá de la clas política pa dirixir esti país. Porque l’alcuerdu al qu’había de llegase nun yera pa dar poderes descomanaos al gobiernu que se formare, sinón namás pa que se formare. Que dalguién echare a andar una llexislatura con un balagar de problemes enorme. Anque llueu ficieren una firme oposición a esi gobiernu. En fin, nun sé lo que fadrán otros que falen de desmotivación de la xente, de abstenciones, de votu de castigu y d’otres mandangues. Yo voi volver a votar y voi facelo en conciencia, pensándolo mui bien y comencíu de que’l mio votu ye importante. Como si fuere la primer vez que lo faigo. Eso nun quita pa que la mio valoración de la clas política tea al nivel más baxu. Peor nun pue facese.
A VUELTES COLA MIO ALCALDESA.- Bueno, llámola mía porque ye la que gobierna Xixón, non porque la sienta como mía. Y nun puedo sentila como mía porque nun me gusta lo que diz, nin me gusta cómo lo diz. Nuna llarga entrevista d’El Comercio vuelve a la so actitú chulesca de nun reconocer nada bueno a los demás. Según ella, nos últimos ocho años nun se fizo nada en Xixón. Habría que recorda-y a esta señora que nesi periodu salieron alantre dos grandes proyeutos: El Plan Xeneral d’Ordenación Urbana, imprescindible pa cualquier ciudá porque, al rodiu d’él ye cómo se construye, cómo se configura. Y el famosu Plan de Víes, pendiente tantos años y que por fin se firmó col gobiernu del Estáu anque, precisamente agora, con ella d’alcaldesa, empiecen a poner pegues burocrátiques. Llueu otres munches coses que supunxeron un aforru pa les arques xixoneses. Y conste que nunca nun voté a la señora Moriyón, anque tenía muncha mayor talla personal y política que la d’agora. En fin, ¡qué cuatro años m’esperen!
CAMPEONES DEL MUNDU.- Un pequeñu apunte namás, aparte felicitar al equipu baloncesto español pol so gran trunfu en China. Tenemos unos grandes xugadores, munchos d’ellos que xueguen na NBA, pero paezme que la victoria llegó, sobre too, pol grupu que formaron. Un verdaderu equipu, al marxe de protagonismos ya individualismos. Y la direición d’un bon entrenador. Un entrenador que nun ye del estilu qu’a mi me presta, más cercanu a Pablo Laso, menos tácticu y más sofitáu en velocidá y contrataque, pero que nel mundial dio una leición de cómo se lleva a un grupu de»egos» y cómo desarmar a los equipos contrarios. Y too ello ensin escaecer el papel que xugaron los modestos que, cuando los «grandes» nun podía xugar, sacaron les castañes del fueu y lleváronnos hasta China. Norabona a toos ellos. Y alón.
