close
Olivando

Olivando

escudu-sieroCOMO UN CÁNCER.- Cáncer: Tumor malín que se va espardiendo y acaba col texíu orgánicu sano (Vid. Diccionariu de l’ALLA) El sainete al qu’asistimos ablucaos los asturianos nel Ayuntamientu de Siero, pon de manifiestu’l grau de mestátasis que contamina’l partíu que, a nun ser un par d’años, vien gobernando dende los anicios de la democracia’l nuestru País. Un sainete dende l’ empiezu, col accidente del agora ex-alcalde, nuna nueche de copes, finando llueu cola entrega de la Casa Conceyu al so rival políticu, el PP, al que-y punxeron en bandexa de plata’l gobiernu municipal. Nun entiendo, nin quiero entender, l’empapiellu de grupos, sectes y aprendices de magu qu’intervienen nel amagüestu: La FSA, el SOMA, los «Arecistes», los «Corralistes» y demás bandes organizaes o ensin organizar. Lo que sí entiendo ye que nun hai drechu a que los asturianos temos mandaos por xente d’esti calter. Porque, en mayor o menor midida, esti esquema de «families» mal aveníes, reproduzse como un cáncer a tola escala de la política asturiana. ¡Yá ta bien d’aguantar a estos «señores»!

L’EXEMPLU D’ANDALUCÍA.- La nueva llei aprobada pol parlamentu andaluz que cinca a lo que se da en nomar: «el bandera-andaluciadrechu a una bona muerte», ye un pasu alantre d’una sociedá que pretende ser más ética y más humana. Qu’una persona empobinada a una muerte cierta, tenga la posibilidá d’elexir un tratamientu paliativu, anque esto suponga acortar esi tiempu d’espera ensin ensperances, a cambiu d’una muerte duce y ensin dolor, ye un avance de la humanidá, lloñe de «mandatos divinos» y mélicos inhumanos qu’exercen una mal llamada «oxeción de conciencia». La única concienca qu’hai que tener en cuenta equí ye la del paciente que, llibremente, tien drechu a decidir sobre la so propia vida. Yá nos manden abondo a lo llargo d’ella, pa que tengan tamién que mandanos a la hora de dexala.

LA DEFENSORA ¿DE QUÉ PUEBLU?.- Agora que tamos en tiempu de recortes y d’aforros presupuestarios, voi a collaborar dándo-y una idea al Gobiernu Asturianu p’aforrar una cantidá indeterminada de perres. Digo indeterminada porque nun conozo’l so presupuestu. Trataríase d’eliminar d’un plumazu eso qu’equí dio en llamase «la Procuradora Xeneral». Una figura qu’asonsaña, mui malamente, lo que n’otres comunidaes se conoz como’l «Defensor del Pueblu». Sé que n’otros sitios esa figura funciona, por exemplu na Comunidá Andaluza, onde ye un personaxe mui respetáu y qu’ayuda a solucionar problemes.  Equí, en cambiu, fízose’l «sinsentíu» de nombrar pa esi cargu a una persona dafechamente comprometida col partíu del gobiernu, doña Mª Antonia Fernández Felgueroso, hermana de l’alcaldesa de Xixón, responsable política del aria de servicios sociales y militante de tola vida del PSOE. Ye nidio, pa tol que nun te ciegu, que pa un puestu nel que la independencia política ye un requisitu imprescindible, esti nomamientu ñaz ya muertu. Naide pue pensar que, una militante comprometida con un partíu, unes persones y un programa, va a da-y problemes a los sos correlixonarios. Poro, la única actividá que tien esi departamentu, que nun sé a cuantes persones atropa, nin que presupuestu tien, ye mandar cartes a un sitiu y a otru. Y cuando se-y entruga por un problema denunciáu, la contestación ye: «nosotros yá mandamos la carta». Lo dicho, fuera, y perres qu’aforramos. O que se faiga como tien de ser: con una persona independiente y de prestixu, y con unes competencies afayadices pa que seya a funcionar.

joseph-biden¿DE QUÉ SE QUEXEN LOS AMERICANOS?.- La cabera visita del vicepresidente norteamericanu, Joseph Biden, a Israel, fue un sonoru fracasu. El señor «vice» coló mui indignáu de la capital xudía porque, nel mesmu momentu en que taba falando col presidente Netanyahu, esti anunciaba nuevos asentamientos xudios en territoriu palestín. Y l’otru «probe» que diba a falar d’esa cantinela que saquen dacuando pa disimular, que se llama «LA PAZ», quedó col culo al aire. ¡Home, un poco de vergoña! ¡Polo menos esperái a que llegue a Washington! Total, que s’enfurruñaron un migayu, más pola cosa estética que pola ética, claro. Pero, bono, nun llegará’l sangre’l río. Los xudíos de tol mundu puen descansar tranquilos, el gran país americanu tará siempre xunto a esi pueblu tan perseguíu a lo llargo de la Historia. ¿Y los Palestinos? Bono, ellos lleven perseguíos namás unos pocos años, entovía-yos queda muncho qu’esperar.