Ye princesa de dos llugares distintos, Asturies y Girona, pero’l so comportamientu nun ye’l mésmu. Equí, na vieya tierra asturiana, nun fala la llingua tradicional de los asturianos, la de los nuestros ancestros, la que competía con castellán, llatín y griegu en tiempos de Marirreguera. Nun sólo nun la fala sinón que nin siquier fai referencia a ella. Ya, ya, ya sé qu’ella nun escribe los sos discursinos, nin los saludinos. Ye claro que toi tirando por elevación escontra so padre y so madre, asturiana ella, periodista ella, conocedora de la nuestra realidá ella. Y él tamién. Recuerdo cuando nel añu 1994, nel Hotel Reconquista, nos recibió’l Príncipe d’Asturies, güei Rei d’España, a l’Academia de la Llingua Asturiana. Tengo fotos d’ello. Una col pleno y otra dándome la mano como a un miembru de la mésma. O seya que sí sabe qu’hai una Academia de la Llingua Asturiana polo menos dende va ventitantos años. Y sabiéndolo, ¿por qué nunca nun fizo una sola mención a ella, a la llingua? ¿Quién-y lo torga? ¿A quién-y tien mieu? ¿Por qué esi despreciu? Vienme too esto, que yá denuncié otres munches veces, al rodiu de la so intervención y la de la so fía, la Princesa d’Asturies y Girona, ayer en Barcelona, onde sí falaron en catalán. ¿Hai que salir a la cai y pidir la independencia pa que te faigan casu? ¿Pa que te reconozan la to llingua y la to cultura? Ye triste que fuere asina. Triste y pelligroso. Porque nun pue xugase colos sentimientos de les persones, a nun ser que quieras siguir fabricando nacionalistes. Entiendo qu’al PP pueda da-y réditos ellectorales, pero ¿al rei tamién?
Imaxen: Getty Images nel Hola.
