Como diz siempre l’ínclitu Gran Wyoming cuando entama’l programa: «Yá conocen les noticies, agora-yos cuntaremos la verdá». Y ye que nesto de les noticies y la verdá, paez qu’hai munchu interesáu n’arrimar les áscuares a la so parrocha (les sardines espaecieron va tiempu). Nun sé si ye eso o ye que, cenciellamente, nun s’enteraron de lo que ta pasando.
Lleo en dalgunos periódicos: «Trunfu de les izquierdes sobre les dereches». ¿Pero de qué me tán falando? ¿Ye que pue siguise con eses yá vieyes denominaciones tradicionales? Porque a min paezme que lo qu’hubo nestes eleiciones fue l’apaición d’un nuevu mou d’entender la política. Abaste sentir falar, por exemplu, a Manuela Carmena, pa date cuenta de que lo que diz y lo que defende nun tien un res que ver colo que dicen y defenden esos llamaos hasta agora «partíos d’izquierdes». Y ye que, anque puedan gobernar en munchos sitios, lo cierto ye que los vieyos partíos corruptos ya anquilosaos perdieron dafechu nes urnes. El Partíu Popular, con dos millones y mediu de votos menos. Pero ye que’l PSOE perdió cientos de miles de votos (700.000 contabilizaben ayer) y algamó los peores resultaos na historia la democracia. Como exemplu podemos poner Xixón, onde pasaron d’aquelles mayoríes absolutes del Areces o la Felgueroso, a los siete ridículos conceyales (pa un partíu como ellos, claro) que tienen agora. Pol so llau, «la otra izquierda», Izquierda Xunida, pasó a ser un partíu cuasi residual en tol estáu, quitando Asturies (pol efeutu Llamazares) y dalgún otru sitiu. Entós el verdaderu trunfu fue’l de los nuevos partíos: Podemos y Ciudadanos (Compromís nun ye nuevu, anque la so estructura y oxetivos paecen asemeyase al llideráu por Pablo Iglesias). Esi ye’l verdaderu resultáu d’estes eleiciones. Porque falar d’un trunfu «de la izquierda», tracamundiando unos partíos con otros, por nun sé qué asitiamientos ideolóxicos ye nun entender nada. Pierden los vieyos partíos, ganen los nuevos.
Podrá dicise que’l PSOE, repito, va a gobernar en munchos sitios, y ye verdá. Los terremotos avisen con unos
primeros temblores enantes del fundimientu pero, o muncho cambien na so estructura interna, na so forma d’atalantar la política y nos sos oxetivos primarios, o pamidea que nin van consiguir les aliences que necesiten, nin van parar pal futuru la sangría votos que lleven teniendo dende va munchos años. Como tampoco paez que’l diariu El País entendiere mui bien los resultaos, cuando diz en titulares de portada que l’oxetivu de Podemos ye desplazar al PP de los sos cargos. ¿Seguro? Lo que pasa ye que nel casu d’El País, más qu’un enquívocu, ye una táutica. Lo que dicen ye lo qu’ellos quixeren que pasare, non lo que daveres defende, por exemplu, Podemos. Por cierto, a los que’l diariu atacó durante meses con enfotu, en titulares, y con tola so tropa de comentaristes.
Pa finar dicir que, na mio ciudá, Moriyón fue la que más votos sacó, porque lo fizo muncho meyor que los sos contrarios y fue capaz de llegar a la xente. Pese a la campaña descarada d’un influyente mediu de comunicación asturianu, que l’atacó -y de pasu a la ciudá- tolos díes del so mandatu. Y tamién pese a otres campañes escontra l’únicu conceyal procedente del asturianismu que, teniendo coses discutibles, tuvo tamién abondos aciertos. Y a bon entendedor…
En fin, éstes son les mio idées… pero puedo tener otres (que diría el gran Groucho)
