close
Pepe Luis

Pepe Luis

2017-01-07José Luis García Rúa737Visitas

Asina quería él que lu llamáremos los amigos, porque José Luis García Rúa, Pepe Luis o simplemente Rúa, yera un paisanu francu y cenciellu al que recuerdo atopar pela cai cola bolsa la compra y  que siempre se paraba a echar una parrafada contigo.

Nun voi a retafilar equí’l curriculum personal de Pepe Luis nin falar de la so ideoloxía -cambiante, pero siempres comprometida- porque otra xente ensin dubia lo fará meyor. Quiero recordar, porque eso ye dalgo personal, que cuando yo taba estudiando Económiques en Bilbao, y mui interesáu nel marxismu teóricu él, que yera anarquista pero con grandes fundamentos filosóficos, ofrecióse a danos una especie de clases particulares a José Agüera y a min, cosa que facíemos, un poco a saltu mata, nel antiguu cafetón San Miguel. Llueu terminábemos falando de too menos del marxismu teóricu. Nos años siguientes, cuando él creo les Comunes Revolucionaries d’Aición Socialista (CRAS) ya dexamos de venos davezu, y muncho más cuando tuvo de marchar d’Asturies y anduvo castigáu per esos mundos de Dios. Podíes tar o non d’alcuerdu con Pepe Luis, yo normalmente nun lo taba, pero lo que naide-y pue discutir ye’l so compromisu cola clas trabayadora y colos más desfavorecíos  de la fortuna. Eso lu  acompañó siempres, hasta esti día en que nos enteramos del so fallecimientu. Que la tierra-y seya leve a José Luis García Rúa. Pepe Luis, pa los amigos.