close
«Podemos» y les prises

«Podemos» y les prises

2014-09-24496Visitas

Pablo_Iglesias_Podemos (1)La prudencia, en política, ye más qu’una virtú: ye una necesidá. Pol contrariu, la premura, les decisiones «al sabor de la boca», los apresuramientos nunca nun fueron bonos. A la vista los sorprendentes resultaos (sorprendentes pa dalgunos) del grupu «Podemos» nes eleiciones europées, ñacieron dos grupos estremaos al calicor de les sos posiblidaes futures. Un grupu, que tien más mieu que vergoña a que los «novatos» barran a los vieyos partíos y a tolo que traen con ellos: malos xeitos, insultos, prensa comprada o domesticada, corrupción… y qu’empleguen la táctica del desprestixu. Y otru grupu que camienta que, con sólo unes sigles, ya ta fechu tol trabayu y les coses van a iguase namás que con presentase a les eleiciones.

Nesi sen, les declaraciones de Pablo Iglesias nel sentíu de que-y paez prematuro presentase a les Municipales, enantes de tener un grupu bien organizáu, con unes estructures (les que seyan) bien afitaes, y nel que la xente cola que se cunta seya de fiar, y non d’esos que s’apunten a última hora pa medrar, a min paeciéronme mui atinaes. El nacimientu d’un grupu distintu, con unes maneres más democrátiques, salíu d’asamblées populares y de xente «non contaminao» poles males artes politiqueres (nada que ver cola política daveres) ye un retu mui complicáu y que, si se consigue, tien de ser a mediu o llargu plazu. Les prises, y nesti casu más, nunca son bones conseyeres.

Esto paez que nun ye compartío pol grupu xixonés de «Podemos», al frente’l cual ta un home tan «curtíu» en munchos frentes como ye Mario Suárez del Fueyo, home d’acción y llucha, como yá amosó siendo lliberáu de Suatea y llueu direutor del Colexu Públicu Xovellanos, El «Podemos» xixonés quier presentase yá, y non esperar a les Autonómiques o coaligase con dalgún otru grupu de calter popular, como recomienda Iglesias. Bien, tán nel so drechu los 1.500 militantes que dicen que son y que tienen unes ganes enormes de «salir a la palestra». Como yo nun pertenezo al grupu, nada tengo que dicir, y dende llueu creo que Mario ye persona de fiar, pero nun taría de más que, enantes de tomar la decisión de presentase embaxo les sigles de «Podemos», valoren bien pros y contras. Quiciás seyan a ganar un puñáu de conceyales, pero’l riesgu que corren ye muncho más importante: un fracasu que llastre’l futuru d’un grupu al que-y espera un devenir prometedor… si nun quieren correr demasiao.