Acaben formase les nueves secretaríes municipales de Podemos y, poro, el nuevu Secretariu Municipal de pueblos y ciudaes. N’Asturies hubo munchos conceyos nos que consiguieron sacar alantre una llista y, a lo que paez, la tendencia política mayoritaria ye la de la llinia de Pablo Iglesias. Nun podía ser d’otru mou al ser la cabeza visible (ya invisible) del movimientu surdíu de les asamblées populares. Polo que se diz, yá que yo conozo a pocos, son xente mozo, bien preparaos y llibres de los pecaos orixinales que se-yos achaquen a los vieyos políticos de los vieyos partíos. Que son «vírxenes», vamos. Home, dalgunos yá militaron en sindicatos o partíos d’izquierdes, pero ensin ocupar grandes puestos que los «visibilizaren».
En Xixón, ensin embargu, la llista ganadora ye la qu’encabezaba Mario Suárez, vieyu rockeru de la política xixonesa, home d’izquierdes, antiguu militante de Suatea, respetuosu col asturianu y bon conocedor de los problemes llocales. Una persona, pues, preparada pal retu que se supón que pue corresponde-y.
Pero a lo que paez nun en tolos llaos ye asina. Quiero dicir, y digo, que polo que sé, hai dalgunos conceyos onde ente los primeros candidatos escoyíos nun hai xente del propiu pueblu, sinón que son xente de fuera -inclusive de fuera d’Asturies-, de xuro con grandes valires, pero que nun tán identificaos cola forma de ser, la cultura o la historia del pueblu al que tienen de representar. Sí eso ye asina, trátase d’un tema que m’esmolez, porque naide meyor que dalguién del propiu llugar pa llevar les riendes de los asuntos llocales.
Tengo sobre l’asuntu una opinión propia. Y ye que, igual que pa facer la política del país, o del Estáu, necesítense los
partíos políticos, pa llevar los asuntos de pueblos y ciudaes fadríenlo meyor xente conocedora d’esos asuntos, al marxe de los propios partíos. Escoyer al que más sabe d’urbanismu, o de cultura, o de facer númberos y xuntalos pa construyir un ayuntamientu que funcione bien. Eso, nel momentu actual, ye una utopía, pues los partíos políticos apoderáronse de toles instituciones, hasta de les propies asociaciones de vecinos, y too ta en función de los intereses de caún d’ellos, nel gobiernu o na oposición. Pero yá qu’ello nun ye posible, lo qu’hai que pidir ye que les persones que tean al frente de pueblos y municipios seyan del propiu pueblu, conocedores de los vecinos y de los sos problemes. Y pa ello, dame igual que seyan d’un partíu o otru. De fechu, conozo alcaldes del PSOE o del PP, partíos a los que nun votaría inxamás que, ensin embargu, son mui bonos xestores y cumplen perfeutamente cola so función. Lo contrario tamién se cumple: nun quiero un alcalde «paracaidista» -o seya desembarcáu d’otru llugar- por munchu respetu que pueda tener hacia la so formación política. Convertiríase neso qu’enantes tanto se dicía de «correa de tresmisión» del so partíu políticu.
En fin, saludo a los nuevos secretarios municipales de Podemos, y do-yos un marxe de confianza pal futuru, pero que nun empiecen a trayer a xente de fuera pa cubrir unos puestos que correspuenden a los d’equí. A los que conocen los verdaderos problemes de la xente en cada llugar. En Xixón, nesi sentíu, abúltame que tán bien representaos.
