Asina avezaba a llamar don Gaspar Melchor de Xovellanos a la so hermana Xosefa, cola que tenía una mui bona y cariñosa rellación… pese al penosu asuntu que yo cuento na so biografía. Porque’l motivu d’esta entrada nel blogue ye informar de la presentación del mio llibru “Xosefa de Xovellanos, “la Esbelta”. La dama ilustrada de les Lletres Asturianes”. Una biografía pa rapazos… y pa mayores que quieran averase a la figura d’esta pionera de les nuestres lletres.
Doña Xosefa Francisca de Xovellanos y Xove Ramirez yera la penúltima de nueve hermanos ente los que figuraba, inmediatamente delantre d’ella, el gran prócer que da nome a munches instituciones de la nuestra ciudá: Institutu Xovellanos –qu’él creo-, Teatru Xovellanos, Biblioteca Xovellanos, y un llargu etcétera que da cuenta de la importancia d’esi apellíu dende va más de doscientos años. Pues d’esi mesmu apellíu, tamién Xosefa tuvo la so importancia, amenorgada pola solombra, siempre presente, del so hermanu.
Casada col Procurador en Cortes en representación d’Asturies, don Domingo González d’Argandona, d’ehí el nomatu que da nome a una cai de Xixón, participó, tanto en Madrid como n’Asturies, nes más importantes tertulies culturales, dalgo inusual tratándose d’una muyer. Quedó viuda mui xóven y, por aciu de los prexuicios de clase de la so familia, nun pudo refacer la so vida sentimental, terminando los sos díes enzarrada nun conventu del que, al poco, fue nomada Priora. Tuvo tiempu pa escribir cinco llargos poemes n’asturianu, onde amuesa la so calidá lliteraria y el so sentíu del humor, tan playu. Poemes que recueyen perfeutamente los valores de la ilustración: buen gobiernu, educación, trabayu y una cosa que falta na xente d’agora: virtú. En cualquier casu, invítovos a que merquéis el llibru porque una parte importantísima del resultáu son los guapísimos dibuxos d’Ilemi Cuesta, con una portada perguapa, y la edición primorosa de la editorial Pintar-Pintar.
La presentación fízose nel marcu de la Feria del Llibru de Xixón, que pudo cellebrase pese a los problemes del coronavirus, y onde la mano de María Xosé Rodríguez tuvo siempres presente. Ellí tuvimos Ester Sánchez, la editora, Ilemi Cuesta, ilustradora, y yo mesmu, que falamos caún dende’l so puntu de vista de lo que supón esta biografía pa la xente d’equí y d’agora, 200 años depués. Y tamién intervieno una actriz del grupu “Higiénico papel” –Laura- que vistida al usu de la época, fizo una Xosefa de Xovellanos mui simpática. En fin, un resultáu mui guapu pa un llibrín que camiento qu’aporta dalgo al panorama lliterariu na nuestra llingua. Gracies a tolos que lo ficieron posible.
NOTA.- Dende la mesa de la presentación pidí públicamente al Ayuntamientu de Xixón que la cai qu’agora se llama “L’Argandona”, que naide sabe lo que ye, pase a llamase Cai Xosefa de Xovellanos, “L’Argandona”. Yá que van a dedicase calles a xente de fuera, bien ta que lo faigamos tamién colos nuestros. Como la xixonesa doña Xosefa de Xovellanos.
