close
Probes con honra

Probes con honra

2015-07-05Referendum griegu382Visitas

Bandera de GreciaNun había nenguna opción positiva pal pueblu helenu nesti Referendum. Saliere lo que saliere, los griegos van siguir siendo probes. Lo qu’al mio xuiciu se xugaba yera si queríen ser probes con honra, o probes deshonraos. El resultáu yá lo sabemos: probes, pero honraos.

Y la verdá ye que lo teníen mui difícil pa escoyer esi “No” que pidía’l gobiernu. Ehí ye nada tola batería de cañones qu’emplegaron el FMI y el Bancu Central Européu, xunto colos grandes países ente los que -¡ai!- s’alliniaba esta España tuya, esta España nuestra, que cantaba Cecilia. Toos menaciaben con grandes llaceries, vengances terribles y “estocades de Lagardere” como se-yos ocurriere votar que nun queríen siguir nesa llinia finaciero-económica, que yá tien demostrao abondamente que namás xenera miseria y probeza.

Y el pueblu griegu, desoyendo inclusive les voces de dalgunos compatriotes suyos que los llevaron a esta situación, y que dirixen otros partíos políticos, dexando de llau les enormes fugues de capitales, como una hemorraxa del capitalismu qu’abandona’l barcu, como les rates, cuando paez que se funde, pasando penriba de “corralitos” y pensionistes que lloren a les puertes de los bancos… el pueblu griegu vota que nun quier eses midíes, y da-y un espaldarazu al so gobiernu facultándolu pa siguir negociando y lluchando frente a la Hidra de les nueve cabeces (¿o yeren siete?)

¿Qué pasará agora? Dalgunos paez que lo teníen mui claro: echar a Grecia del euru, y como sigan siendo malos, de la propia Comunidá Europea. Veremos, que dicen que dixo’l ciegu. Lo que yo tengo claro ye que’l Capital nun ye bobu, y que nun va a tomase revanches de resultes d’una pataleta. Fadrá como fizo siempres: lo que meyor vaiga pa los sos intereses. O seya, pa recuperar les más perres que puedan. Si eso supón echar a Grecia a les tiniebles esteriores, nun-yos temblará’l pulsu. Como tampoco-yos temblará si hai que siguir negociando, y dando más facilidaes pa que los griegos puedan pagar lo que deben: con una quita, con más plazu, con una renegociación de la deuda tal y como pidía’l gobiernu griegu. Lo único que quedó claro pol momentu, ye que’l vieyu pueblu helenu sigue calteniendo la so dignidá., lo cuál nun ye poco.  Anque van siguir siendo probes, claro.