close
¿Pudimos?

¿Pudimos?

podemosTeníamelo anunciao Iris ente’l mio esceuticismu: «Yá verás cómo Podemos va dar la campanada». Y diéronla. Más que campanada, campanazu, porque sacar cinco escaños pal Parllamentu Européu faciendo una campaña cuasi ensin perres, con poca presencia física nes televisiones y poca nos papelos pero, eso sí, utilizando bien les llamaes «redes sociales», tien un méritu pergrande. Los partíos tradicionales, vieyos, anquilosaos, sapozaos nos sos propios problemes, autistes cara a la sociedá y con un desprestixu cada vuelta más grande, pegáronse un sapotazu espectacular. Tiénenlo merecío. ¿Valdrá pa dalgo? Sinceramente camiento que non. Dalgún diz que sí, qu’hai que cambiar coses, qu’hai que sentir la voz del pueblu, etc. etc. Nun lo creen nin ellos. Seguirán cola so falta democracia, les sos llistes zarraes, l’empecinamientu en descalificar «al otru» (too n’él ye malo), los problemes que namás-yos interesen pa siguir esfrutando los sos privilexos… Pero lo malo ye que nun son ellos solos los que tendríen de sentir la voz del cambiu, tamién otros. Por exemplu esa militancia rancia, que traga con too por galbana, o por intereses personales o de grupu… ¿Qué tendría qué facer el PP pa que los sos votantes dexaren de votalu? Más ye imposible, con tropecientos casos de corrupcion abiertos nos xulgaos, con unos tesoreros (cargu d’importancia másima) que fieden dende mui lloñe… ¿Cuál ye’l llímite? ¿Ónde ta la llende? Y lo mesmo esa otra militancia del PSOE, igual de rancia, ensin desixir a los sos xefes un cambiu dafechu nos sos comportamientos y pidir desplicaciones pol abandonu de la so ideoloxía. Y otros tamién. ¿Cómo ye posible que’l PNV vuelva a ganar en Sestao depués de lo que dixo de los emigrantes el bárbaru del so alcalde? ¿Cómo nun dar la razón a los Indignaos, a los antisistema?

Pero tamién cambios nes valoraciones de la Prensa y la Televisión, que siguen dando espacios y anuncies a esosCañete partíos derrotaos en toles batalles, ensin dexar intervenir a otres voces nueves que sí tienen que dicir coses. Los direutores y redactores de la prensa asturiana y española, siguen tratando al PP y al PSOE con una deferencia que ya perdieron coles sos mentires y griesques ente ellos. Namás hai qu’echar un vistazu a la prensa diaria y ver l’espaciu qu’ocupen esos partíos en decadencia total. Esa sí que ye una borbuxa que debería españar.

Pa lo cabero, lo más importante. L’indiz d’abstención ye tan grande que cualquier llogru hai que lu rellativizar. Nun pue dicise que ganaron estos o aquellos: perdieron toos. El 55% d’abstención amuesa que la mayoría de la sociedá da la espalda a una forma d’entender la política y a los políticos que la prautiquen. ¿Hasta qu’altor tien de xubir l’abstención pa que se tome esto en serio? ¿Hasta el 75%? ¿Hasta el 90%? ¿Con eses cifres siguiríen considerándose ganadores los que sacaren los escaños? Y quiénes son los beneficiaos de too esto: Los grupos racistes, los violentos, los partíos xenófobos. Da murnia ver los ganadores na Europa mal llamada «comunitaria». En fin, qu’ehí ta Podemos. Pudimos. ¿Podremos?

P.S. Unes hores depués de colgáu esti comentariu, siento na radio falar al señor Rubalcaba «reconociendo» los erros del so partíu. Pa finar, da la norabona a Javier Fernández pol gran ésitu algamáu n’Asturies. Nota: el PSOE sacó n’Asturies nel 2009, 189.783 votos, y nestes eleiciones 97.928. La metada. ¿Ú ta’l gran ésitu? ¿Ye que sacaron más que’l PP? Abúltame que Rubalcaba sigui ensin entender nada.