Tuvi esperando, a posta, hasta esti día llamáu eufemisticamente «de reflexón», y nel que yá nun pue facese campaña ellectoral, pa facer yo la de mio, fendiendo eses normes de publicidá, marcaes polos de siempre, y que dexen fuera d’elles a los coleutivos que nun xueguen al so xuegu. Asina pues, entiéndase esti pequeñu comentariu como un mou de romper esi día «sagráu» nel que, de mentires, dicen qu’hai que reflexonar.
Porque ye imposible reflexonar ante l’avalancha de páxines y paxines na prensa escrita, y d’espacios regalaos na «tele» y na radio, onde nun hai un solu mensaxe nuevu, una idea aprovechable, una fras con sentíu común. Too son tópicos remanaos de mil maneres que’l papanatismu de la prensa recueye con grandes titulares, como si de dalgo con conteníu se tratare. Nosotros somos los meyores. Los que vamos sacar a Asturies de la crisis. Los demás son … y equí podemos poner toles babayaes que se nos ocurran porque val too. Lo malo ye qu’equí yá nos conocemos toos. Los que gobernaron y los que ficieron oposición (y al «resve»), y yá tenemos comprobao que nengún d’ellos va a sacar a Asturies d’una crisis que ye dalgo más qu’eso, porque lo que daveres tien la nuestra patria ye una completa falta d’identidá. Yo propondría, a los políticos que se presenten a estes eleiciones, una cenciella pregunta: ¿Qué ye pa ti Asturies?, y a la vista les contestaciones podríemos ver la vacuidá de conteníos qu’apunten y, poro, la imposibilidá de facer una política, dende y pa, el nuestru país. Tolo demás ye verborrea y supeditación a otros intereses que nun son los nuestros, porque inclusive los únicos que dicíen antes, cola boca pequeña, eso de «País», ya amosaron sobradamente que, a nun ser cuatro caxigalines pa la galería, tampoco nun tienen nengún enfotu, nin nenguna idega, pa facer les polítiques que podríen sacar a Asturies d’esi «limbo» nel que lleva somorguiada cuantayá.
Cuando s’anunció la convocatoria d’eleiciones, dalgo absurdo que vien por nun saber facer lo mínimo que se-y pide a un políticu, que ye llegar a alcuerdos, apunté que la meyor manera d’amosar la nuestra protesta sedría col votu en blanco, y nel casu de los partíos políticos asturianistes, el nun presentase pa nun face-yos el xuegu. Xugar, precisamente, con esa abstención p’apuntase’l tantu de los que nun van tres los que toquen la marcha real. Nel casu de la coalición Bloque-UNA-Verdes yera muncho más evidente, puesto que taben, amás, nun procesu de formación y consolidación de la mesma y esto coyíalos col pie cambiáu. Ellos valoraron les coses d’otru mou y presenten la so candidatura polos motivos que tengan. Quedó claro que los medios periodisticos y políticos que funcionen n’Asturies nun tán pol llabor de da-yos oportunidaes. Dediquen páxines y páxines a repetir lo mesmo tolos díes, y a sacar a los mesmos partíos diciendo les mesmes babayaes, cuando nun traen a otros de fuera pa que les digan entá mayores. Pero nun dexen nin un mal requexu pa sentir a un grupu que pretenda facer otra clas de política: una política asturiana, dende asturies. Incumpliendo, amás, los tiempos de presencia nos medios públicos, como ye la TPA. Deben tener mieu que los asturianos puedan salir del pigazu y la galbana, y votar a coses nueves.
Asina que, como ellos incumplen les sos propies normes, toi encantáu de fender yo les suyes. Y por ello, güei que ye día de reflexón, voi recomendar, dende esti pequeñu requexu perdíu nel «eter», y a la vista de los grupos que se presenten, que votéis a la Coalición Bloque-UNA-Verdes. Que nun quedéis en casa y regaléis a esos mexanises que pretenden manipulanos otros cuatro años, el vuestru votu o la vuestra abstención. Que, anque nun teis (nun temos) comencíos d’ello, sofitemos a una xente que, colos sos enquívocos, trabaya daveres por una Asturies distinta de la que nos ufierten «los de siempre». Y pa les prósimes, a ver si se faen les coses un poco meyor. ¡Ah! Y que reflexonen ellos, que bona falta-yos fai. Anque pa lo que va a sirvir…
