Fízose una consulta a los militantes y, creo, simpatizantes, del PSOE y ganaron los del Sí. La verdá ye que nun entiendo mui bien a qué votaben Sí y camiento que la mayoría d’ellos tampoco, pero yeren les instrucciones «d’arriba» y hai que ser siempre fieles col que manda. Lo único que m’estraña ye que tamién ganara el Sí-a-lo-que-fuere, equí n’Asturies, porque la FSA siempre se les arregla pa dir col pasu cambiáu respeutu a los que manden en Madrid. Hubo hasta nun congresu nel que votaron a un candidatu que nun se presentaba. En fin, los más llistos.
Yo, por moyame un poco, entiendo que los que voten Sí ye a gobernar, o seya, que quieren que’l so partíu, aliáu con cualquier otru que quixere, o con una mecia d’ellos, seya’l que gobierne. Los medios pa ello, lo qu’haya que firmase, o con quién se faiga esa firma ye lo de menos. Ellos quieren gobernar y pa eso dan el Sí. Nuna película de ciencia-ficción la cosa diría porque agora el tal Sánchez llegaría a un gran acuerdo col PP y gobernaría en coalición cola derechona a la que ponen a parir, en plan «Dormiendo col mio enemigu». L’aprobación d’agora valdría tamién pa eso.
En cualquier casu, tengo claro que lo mío nun va polo de «analista políticu»: nun entiendo nada de too esto. Siento
opinar na prensa y na tele a la xente y tol mundu paez tener mui nidio lo que pasa: «Ye qu’esto ye pa provocar la reaición d’estos otros». «Lo que daveres quieren estos ye esto otro y entos…» «Non, estos quieren nueves eleiciones y pa ello…» Oye, será too verdá, pero yo nun m’aclaro. Veo que se forma una mesa de cuatro grupos dende’l centro izquierda (PSOE), hasta’l restu les izquierdes y digo: «Bueno, van intentar axuntar a les izquierdes pa gobernar». ¡No, home, non! A la segunda reunión entérome que’l PSOE firmó un alcuerdu con Ciudadanos, que son incompatibles con Podemos, que al tiempu son incompatibles col PP. Y al «resve». Total, una casa cites que nun hai quién la descifre, polo menos yo.
A ver cómo acaba too esto, pero yá me lo toi temiendo: a votar otra vez, y l’Estáu a poner el güevu porque estos inútiles a los que yá votemos nun son capaces d’algamar unos mínimos alcuerdos, anque fuere pa gobernar en minoría. Pues yá dixo la mio muyer que nun la llamen otra vez pa ser Presidenta de Mesa, que la última esperiencia que tuvo fue matadora. Que presidan ellos si quieren. Y yo toi con ella. Y a too esto, estos fatos de los socialistes votando que Sí. ¿Pero a qué, ho? ¿A qué votáis que Sí, al bable nel Parlamentu…?
