Siento nun sentilo

Muerre esti día Gustavo Bueno con una edá ya provecta, creo que noventa y un años. Yera un personaxe conocíu y controvertíu. Nunca me cayó bien. Había dalgo n’él que nun me gustaba y diome siempres la impresión de que taba interpretando un papel: el de provocador. Igual ye lo qu’él quería. Nun voi a xulgar equí la so figura como intelectual, otros lo fadrán encontradamente, unos a favor y otros en contra. Pero lo que nunca-y perdonaré fue la campaña militante qu’entamó  escontra la nuestra llingua y la nuestra idea d’atalantar el País, el nuestru, que non el suyo. Y nun-y lo perdonaré porque utilizó la so posición de privilexu social y la repercusión de les sos postures p’atacar un bien cultural que munchos consideramos fundamental na nuestra forma de ser y d’atalantar el mundu. Descalificándonos, faciendo burlla de nosotros y de lo que defendíemos ensin neguna autoridá nuna materia de la que demostró nun tener nin puñetera idea. Nin, por supuesto, nenguna sensibilidá pa con una tierra que lu acoyó y dio-y de comer. Nun quiero estendeme más. Allá él colos sos «sensatos y pensantes» amigos. Nun seré yo’l que derrame una sola llárima por él. Siento nun sentilo.