close
Sindicatos embaxo sospecha

Sindicatos embaxo sospecha

2017-01-28619Visitas

Llevaben ya munchu tiempu acusando a los sindicatos, y a distintes patronales, de fraudes numberosos nel tema de los cursos de formación y otres coses pol estil. Inclusive n’Andalucía peme que yá hubo procesamientos nesi sen, y equí n’Asturies la revista Atlántica XXI, d’esi indesmayable periodista que ye Xuan Cándano, vien dándo-yos «caña», con acusaciones series, a la UXT asturiana comandada pol eternu Justo Rodríguez Braga, anque agora sólo seya un ex-secretariu. Los abogaos del sindicatu asturianu tiraron con bala, nun sólo escontra la revista, sinón tamién escontra los que recoyeron les sos informaciones, casu del conocíu periodista, tamién asturianu, Gregorio Morán, que lo fizo nel periódicu La Vanguardia.

Y ye que la «picaresca» al rodiu de les perres públiques ye un non parar. Talamente paez qu’eses perres nun son de naide y nun importa marafundiales. Tolo contrario: esi dineru ye de toos nosotros, que tenemos qu’apertanos los bolsiellos pa pagar unos impuestos d’onde sal tolo públicu. Nin l’Estáu Español, nin la Comunidá Europea tienen un euru propiu, too sal de nosotros. Poro, eses subvenciones pa formación, igual que nel so día los fondos mineros, o cualisquier otra axuda pública, tán costándonos esfuerzu y sudor a los paganinis de siempre. Mientres, los sindicatos y les patronales tiren con polvora del Rei, dedicando eses perres a autofinanciase o a coses entá peores.

Nun soi quien pa xulgar la categoría del supuestu delitu que se produxo, si ye penal, alministrativu o d’otra mena, pero fuera’l que fuere, si ye que daveres se produxo, los responsables tienen de pagar por ello y alloñalos inmediatamente de cualquier responsabilidá de remanar fondos públicos. Dicho esto, prestaríame amestar que’l «desfile del día de la Victoria» que fizo la Guardia Civil pa detener a los supuestos defraudadores taba dafechamente fuera de llugar. Nenguna sorpresa había nel tema pa pillalos in fraganti, pues la cosa yá taba investigándose dende Avientu de 2014. Esa iniciativa, que paez que fue de la propia policía y non de la xueza Carmen Blanco, anque ésta «fue informada», nun paez de recibu, más nun momentu en que tán xulgándose otros casos de «choricismu» a gran escala. ¿Cortina de fumu? ¿Toos somos iguales y robamos en cuantes tenemos ocasión? Cuidao con eso, porque la Guardia Civil y la Policía (toles policíes) son tamién un serviciu públicu que pagamos los ciudadanos, y non un organismu  al serviciu del gobiernu de turnu y de los sos propios intereses. Cuidadín con eso.
(Semeya: J.L. Cereijido)