close
¡Ta llueu, Fernando…!

¡Ta llueu, Fernando…!

Fernando-ArgentaA Fernado Argenta nun puedo denomalu como un “muertu ilustre”, talo que’acabo de facer con otros, porque s’enfocicaría. Si él fue a quita-yos la peluca y la povisa a los mayestros de la música clásica, como vamos a estes altures a poné-ylos a él.

 Fernando fue un «axitador” musical, un francutirador, un sufraxista de la causa. Una causa que nun yera otra qu’esa maraviosa música clásica a la que nunca nun podíemos acceder porque nos resultaba “un peñazu”. Non la música, nin los autores, sinón los “entemediarios”. Esos cursis, pesaos, grandilocuentes y carcas presentadores, comunicadores, escritores del tema, etc. etc. Sí, vosotros echasteis del mundu de la clásica a munches xeneraciones.

 Pero ye que, amás, el formatu de “Clásicos Populares” nun pue quedar namás pal mundu de la música: habría que lu aplicar tamién pa otros “clásicos”, como por exemplu na lliteratura. La visión que se nos da, por exemplu, de los nuestros clásicos lliterarios (los españoles, los asturianos…) son d’una xente aburría qu’escribía coses que nun nos interesen. Falso. Mentira. Tornen a fallar los “entemediarios”. Doi pallabra de poder facelos entreteníos, como Fernando lo fizo colos músicos.

 Dos pallabres pa quita-y un momentu’l protagonismu a Argenta y trespasá-ylu a otru xenial comunicador: Carlos Tena.Beethoven Carlos, entendidísimu críticu de música pop, rock y toles sos variantes (traduxo por primer vez les lletres de los Beatles y de Dylan), fue’l primer llocutor del programa “Clásicos Populares” en RNE. Añu 1976. Yo siguíalu, dende 1973, nun programa de tarde que se nomaba “Para vosotros, jóvenes”, xunto a otru super-friki como Gonzalo García-Pelayo, que yera una prestosidá. Asina qu’abluqué cuando lu sentí presentar un programa de música clásica. Enganchóme. Yera como un programa modernu, con comentarios sarcásticos, cortes musicales y munchu aneudotariu. Y asina Vivaldi yera’l “cura pelirroxu” y Beethoven el “divinu sordu”. Creo recordar que l’esperimentu duró dos o tres años. Llueu, por razones que nun conozo, pero que supunxeron un enfrentamientu ente dambos, relevólu’l propiu Argenta, que yera’l guionista del programa. Y yá dende entós, a lo llargo de munchos años, hasta’l 2008 en que lu xubilaron de la emisora, fue él el que conduxo’l programa. Tamién mui bien, claro.

 Bueno, creo que m’enrollé un poco como suel pasame siempre ¿non? El casu ye que toca despidir agora a un fenómenu de la comunicación musical que fizo grande a la música clásica, tratándola como si fuere pequeña. Porque’l que ye grande daveres nun necesita que lu emponderen, nin que lu adoren. Y como sé que nun-y prestaríen a Fernando Argenta grandes frases pal so adiós, dende esti modestu blogue dígo-y namás: “¡Ta llueu, Fernando…!”.