Van facer santa a la llamada Teresa de Calcuta. Como nun soi creyente, dame igual que lo faigan o non porque, amás, eso de que desixan tener fechu dalgún milagru nestos tiempos poco milagreros pazme una desaxeración. ¿Nun-yos abasta con que fuere bona persona y exemplu de vida pa los creyentes? Pero, en fin, el fechu de que yo nun lo sea nun quita pa escribir un par de coses sobre la so figura.
Teresa dedicó la so vida –llarga vida- a trabayar colos más probes d’ente los probes. Enfermos, moribundos, esaniciaos de la fortuna… Construyó hospicios, hospitales, escueles… Y lluchó escontra dalgunes enfermedaes mui espardíes na India, como por exemplu la lepra. Por too ello ganó’l Premiu Nobel de la Paz y el reconocimientu de la xente, tanto los humildes como los poderosos.
Critiquen d’ella dalgunes postures haza l’albuertu o’l divorciu, asina como que predicaba la resignación en llugar de la llucha. Bien, podrá tase d’alcuerdu con ella o non, pero’l so exemplu de vida hai que lu valorar mui positivamente. Si la décima parte de los cristianos ficieren un poco de lo qu’ella fizo, otru gallu cantaría a esa relixón cada vuelta más separtada del so mensaxe orixinal. Poro, a min préstame esti reconocimientu qu’agora se fai a Teresa de Calcuta, esa muyer que, cuando’l Papa Pablo VI regaló-y una limusina como agradecimientu pol so llabor, al día siguiente fue a vendela y colos perres entamó un hospital pa leprosos. En fin, ensin entrar nin salir de la supuesta “santidá” de Teresa, quiero reconoce-y dende equí la so xera pa colos que nada tienen. Igual los que la critiquen podíen facer un poco de lo mesmo.
