Ta mui de moda, como solidaridá con dalgún afeutáu pol tema que seya, unos más graves y otros menos, esa fras de «Toos somos…»: Fulanitu. Una muyer asesinada, les víctimes d’un atentáu, o un casu de desahuciu. Ensin embargu, el títulu d’esta pequeña entrada nun va per esi camín. Ye verdá que se ta ruxendo muncho nos mentideros deportivos, y agora tamién sociales y políticos, la fras racista cola que se quier insultar al escelente xugador del Real Madrid Vinicius. Nun ye’l primer casu nin será l’últimu, pesie a esi gran movimientu de condena a los barbaros que lu emplegaron. Y ye que’l fútbol camudóse, dende va munchu tiempu, n’abellugu de fachas, racistes, fascistes y demás calaña, camuflaos ente otra xente que-yos lo consiente porque dicen que «animen muncho». Principiando poles direutives de los equipos qu’agora danse golpes de pechu, y que nel so día hasta-yos cedieron llocales pa que s’xuntaren.
Estos díes, acabo yo de publicar un llibrín de cuentos de fútbol tituláu «Un par de botes», onde se recueye la otra cara d’esti guapu deporte que, a munchos, encartiónos de neños y rapazos pa divertinos y, al empar, formanos como persones. Pero eso ya finó cuantayá. Agora insúltase y pégase a los árbitros y a los rivales dende les categoríes más pequeñes: los benxaminos. Lo de Valencia (y otros munchos sitios) ye la consecuencia d’una socieda que perdió los papeles va munchu tiempu, onde padres, intermediarios y los propios equipos (ganar ye lo único qu’importa y poderosu caballeru ye don dineru) guarden los escrúpulos con tal de facese ricos o algamar notoriedá.
Al tiempu qu’esta polémica por llamar «monu» a Vinicius, colos xestos correspondientes, hai una guapa entrevista nel XL Semanal a Juan Luis Arsuaga que nos recuerda que: «Venimos del mono, bastante hemos conseguido». Ye dicir que los que pretenden insultar a otros con esi apelativu, nun deben ser conscientes de que los sos antepasaos yeren precisamente monos y que, en realidá, tán insultando a la so familia. La diferencia ye qu’ellos debieron quedar en dalguna etapa menos evolucionada que los humanos. O seya que, por dicirlo de dala manera, tán más prósimos a los antepasaos homínidos que’l restu de la xente. A ver si nel fondu van ser unos gritos reivindicativos…
