Nun suelo dexar esti espaciu pa plumes ayenes. Non por nada, sinón porque me presta ser yo quien lu use pa dicir lo que me pete, otros tienen distintos medios pa facelo. Dalguna vez faigo esceiciones, poques, pero ésta va ser una d’elles, porque l’artículu de Milio Rodríguez Cueto asoleyáu en La Nueva España del 19/10 paezme una bona aportación al discutiniu sobre l’usu del asturianu y el derechu a emplegalu en tou tiempu y llugar. Quiero compartilu colos amigos que vienen lleéndome dende va tantu tiempu. Qué vos preste.
YE RACISMU
«Primero, un chiste políticamente incorrectu: una familia negra pasea pela playa: padre, madre y un neñu. El neñu pega pataes a l’arena y, nesto, zapica con daqué duro. Desentiérralo y resulta ser una lámpara d’aceite. Resfrégala pa quita-y l’arena y de dientro sal, con munchu fumu y munchu esparabán, un «ifrit», un xeniu. «¡Tres mil años llevaba presu nesta lamparuca! ¡Agora, n’agradecimientu por soltame, voi concedevos tres deseos!» El padre pasa una mano pel cazu, pensatible, y diz: «Home… yo ya toi un poco fartucu de que me pare la policía por ser negru… Yo quería ser blancu pa vivir más tranquilu…!» ¡Xazam! Una fumareda y ya ye blancu. Mira les manes, incrédulu y feliz, y al momentu anima a la muyer: «¿Has visto, Carmina? ¡Soy blanco! ¡Pide tú!» «¡Meca! ¡Yo tamién quiero ser blanca, ho!», acelérase ella. ¡Xazam! Blanca tamién. Entós, miren los dos pal fíu. “¡Venga, Nel! ¡Pide el tercer deseo!” Nel sescude la cabeza, duldosu: «Ye que yo nun sé lo que m’apetez…» «¡Hombre, Nel! ¡Pero fíjate en nosotros! ¿Cómo no lo vas a saber? ¡Somos blancos!» «Ye qu’a mi… bah… ser blancu… como que tampoco me da más…» Entós, los padres llevanten los puños pa escontra’l cielu y esclamen: «¡Mecagondiez, medio minuto que llevamos nada más de blancos y ya nos está tocando los cojones este negro!»
Segundo: Rosa Parks. Usté conoz la historia. Yera negra y, en 1955, negóse a llevantase d’un asientu d’autobús acutáu pa blancos. Había un reglamentu qu’imponía esa medida pero ella decidió desobedecelu porque lu consideraba inxustu. Y, gracies a aquel xestu, los reglamentos cambiaron: el de los autobuses y munchos más.
Berta Piñán, la conseyera de Cultura, ye negra, como yo. Usar esta lllingua qu’usté llee agora mesmo faite negru n’Asturies. Teresa Mallada, la del PP, ye blanca, pero de va cuatro díes, de los blancos de lámpara: delátala l’apellíu. Otro tanto-y pasa a Adrián Pumares, el parlamentariu de Foro. Laura Pérez Macho, la portavoz de Ciudadanos, en cambiu, ye de los blancos de tola vida. Y l’archienemigu de Hulk, The Leader, ye verde.
Berta Piñán subióse a un autobús llamáu Xunta Xeneral y los blancos (y el verde) echaron les manes a la cabeza: l’asientu que quería ocupar teniénlu acutáu ellos. Otros blancos bonos, de los que simpaticen colos negros (pero blancos a fin de cuentes), presentes naquel trayectu, aconseyáron-y a la negra Piñán respetar el reglamentu, y ella sometióse. Decidió nun ser Rosa Parks. Agora, too son dificultaes pa cambiar esi reglamentu. Los asientos siguen acutaos pa los blancos y, según los espertos, hai nun sé cuántos impedimentos legales pa que los negros los ocupen.
Ye racismu. Si quier usté, acompáñelo del axetivu lingüísticu, pero otra forma de racismu, de discriminación pura y dura vinculada a un fechu identitariu. Igual s’entendía con más claridá si «los del bable» pintáremos la cara de negro cuando salimos en manifestación pidiendo que nos traten como al restu de los ciudadanos españoles: pidiendo que nos faigan ciudadanos españoles de plenu derechu.»
Milio Rguez.Cueto
(Na semeya policial, Rosa Parks)
