close
Turquía: imáxenes y pallabres

Turquía: imáxenes y pallabres

2013-06-05manifestacionesTurquía367Visitas

Protesta Estambul 1Siempre qu’apaecen protestes, de la manera que fuere. Siempre que la xente sal a la cai pa manifestar la so opinión o ciriticar determinaes midíes de los gobiernos, éstos, seyan del signu que seyan, intenten presentar los fechos con aquelles frases que dicía Franco y qu’entovía recuerdo al pie de la lletra: «Esas minorías de eternos descontentos que a nada ni a nadie representan…» Agora llámenlos tamién «minoríes violentes», «antisistema», etc. Y yo nun digo que nun haya d’esos, ta claro que sí los hai, pero presentar cualquier clas de protesta, de disidencia, como procedente d’eses minoríes ye una mentira como una casa. La xente normal tamién protesta/protestamos.

En Turquía ta entamándose dende va unos díes una protesta escontra, nun tanto un gobiernu, sinón una forma de gobernar. Asina, dalgo que nació como una defensa ecoloxista, pa preservar un parque escontra la invasión inmobiliaria, camudóse por obra d’una actuación policial descomanada ya indiscriminada, nun mar de protestes que van mas lloñe del fechu puntual. Y ye que Turquía, como recuerden los manifestantes, nun ye Siria, nin Irán. Turquía ye un país con unes estructures más modernes, laicu, cuasi democráticu, incluyíu na OTAN y a piques d’inxertase na Comunidá Europea. Y, ensin embargu, l’amigu Erdogan y los suyos carguen contra les protestes, culpen a les redes sociales y tornen a eso de les «eternes minoríes»: mal camín escoyeron.

Como munches veces se diz, val más una imaxen que mil pallabres. Mándame’l mio fíu Xuan unes guapísimes semeyes de les manifestaciones d’Estambul y nelles pue vese la forma de protesta y la xente que la fai, xente como tu o como yo. Namás viendo estes semeyes dámonos cuenta de que’l gobiernu miente, y que la cosa nun ye d’eses minoríes, sinón d’un pueblu educáu y sensatu que ta hasta’l gorru d’un determináu mou de facer política. Que gobiernen pa toos, y nun sólo pa los suyos, paez que sedría’l meyor camín d’evitar los enfrentamientos. Paga la pena ver les guapísimes imáxenes, la de la paisana con la mázcara de V de «Vendetta» ye impagable.

 http://imgur.com/a/JvJD3