25 años ye un cuartu sieglu. Sí, yá sé qu’eso ye una evidencia, pero falar d’un cuartu sieglu d’un grupu musical ye cuasi un acontecimientu. Pocos grupos puen presumir, como Dixebra, de tar tantu tiempu xuntos, faciendo una música prestosa y, lo que-y da otra dimensión más importante, trabayando pal conocimientu, esporpolle y afitamientu de la nuestra llingua. La llingua asturiana. Poro, yo quiero dende esti modestu escañu da-yos les gracies polos bonos momentos que me ficieron pasar y pola llucha que, dende los anicios, entamaron pa llevar alantre esi bien cultural qu’otros desprecien. Un bien cultural que, de xuro, tamién-yos torgó l’accesu a otres canales de distribuición a nivel del Estáu (méritos pa ello tienen) y qu’ellos dan por bien emplegao por tar acordies colo que defenden: la dignidá de la llingua del nuestru pueblu.
Amás, préstame pola vida que nel vidiu promocional de tal eventu, incluin una canción a la que-y tengo un especial ciñu: «El Merucu Xusticieru». Nun fai falta que recuerde que yo fui l’inventor del «Merucu…» naquelles primeres histories qu’escribi de «Xicu y Ventolín», alla pol 1982 (conste que nunca nun cobré copyright). Poro, pa mi siempre fue un arguyu que Dixebra lo cantare. ¡Un abrazu Xune Elipe»! ¡Un abrazu collacios! Y ¡feliz aniversariu!
