LLeven munchu tiempu los responsables del Principáu queriendo comencer a los non asturianos de qu’esto, la nuestra tierra, el nuestru país, ye’l Paraísu Natural. Esi ye l’eslogan que remanen y, hasta tal puntu lu defenden que llevaron ante los tribunales a otra comunidá (agora nun recuerdu cuál) por emplegar esi términu na so propaganda. Perdieron, claro, porque esa espresión nun pue ser patrimoniu de naide.
Pero un Paraísu Natural ye daqué más qu’un preciosu paisaxe, dalgo que, per otru llau, vien-yos dao a les autoridaes ensin facer nada por ello. El paisaxe ta ehí y lo qu’hai que facer ye curialu y non estrozalu como aveza a ser normal. Pero amás del paisaxe, el susodichu Paraísu Natural tien de ser un llugar onde la vida seya saludable, onde la xente ñazca, viva, se desarrolle y muerra nunes condiciones de salú afayaíces. Onde la comunión (pallabra repunante, ya lo sé) de la xente y la ñatura seya un fechu y non un eslogan pa turistes despistaos. Nun ye’l casu d’Asturies. Ta acabante conocese un informe del Ministeriu de Mediu Ambiente nel que se diz, con tolos datos, que nun sólo ye qu’esi Paraísu Natural nun esiste, sinón que’l nuestru País ye’l más contamináu del Estáu, y un de los más contaminaos d’Europa. L’,’únicu d’España nel que se superaron los llímites añales de partícules PM10. Unes partícules que’l güeyu nun ve, pero que s’enxerten nel sistema respiratoriu y axúntense a los alveolos, torgando’l correutu intercambiu d’osixenu ente los polmones y el sangre.
Tamos viviendo, entós, en tolo contrario d’un Paraísu Natural. Nuna especie
d’infiernu de mierda y polución¿Y les autoridaes qué faen al respeutu? Pues nun sólo nun faen nada, lo cuál ya tien delitu, sinón que, amás, anden valorando meter entovía más industries contaminantes como sería’l casu d’una inceneradora que vendría a agravar, entá más, esti problema que carecemos. Y asina, mentanto otres partes d’España van, pasu ente pasu, meyorando, como ye’l casu de Granada tamién enantes sapozada nesos índices negativos, nosotros siguimos empeorando quedando, agora, solos nel ranking de los más gochos, de los más contaminaos.
Los culpables, hai que lo dicir, son tolos gobiernos que van pasando, socesivamente, pol Principáu. Con una coña añadía, que’n dalgunos d’ellos tuvieron presentes unos individuos que representaben a un coleutivu denomáu «Los Verdes», en coalición con Izquierda Xunida. Nun sé qué pintaben estos señores, unos y otros, nel Parllamentín, pero poco ficieron por meyorar esti tema.
Hai que pidir, entós, por parte la ciudadanía, que d’una vez por toes se tomen les midíes necesaries p’atayar esti gravísimu problema, faciendo casu a los verdaderos grupos ecoloxistes y, mentanto, que dexen d’esbarriar utilizando esi términu de Paraísu Natural que nun tienen derechu a emplegar. A engañar a otru llau.
