Celebro con ganes el trunfu eleutoral de la coalición Syriza nes eleiciones griegues. Nun sé cómo será’l futuru (¿quién lo sabe?) nin pa la propia coalición, nin pal preciosu país griegu, pero por una vez los pequeños ganaron a los grandes. Más que grandes: grandonos. El pueblu griegu -y tamién l’español- ta hasta la gorra de troikes dictatoriales y apavoriantes, de bancos devastadores que ganen a manes enllenes y que cuando pierden tienlo que pagar el pueblu, de vares de midir descompensaes, que siempres miden escontra los probes y, en fin, de pagar por una crisis que los mesmos que la produxeron quieren beneficiase d’ella.
Y cuando se diz esto, y cuando se diz que too esto nun ye un castigu divinu, como les plagues exipcies, y cuando se diz que pue haber otra Europa, y otru mou de salir de la crisis, dícente qu’eso ye populismu. Y a los que lo dicen, llámenlos «populistes». Pues yá ta bien, queremos un poco de populismu, por favor. Queremos que los fíos de los griegos, pero tamién los nuestros, tengan dalguna oportunidá de trabayar y vivir decentemente nel nuestru país. Queremos que pare la sangría de los nuestros derechos, unos derechos que costó sangre, sudu y llárimes el conquistar. Queremos que la xente pueda tener una vivienda -yá cuasi nun dicimos nin «digna»- ensin que la echen d’ella por nun poder pagala. Y un puestín de trabayu, modestu, pero que te dea pa vivir y del que nun puedan echate porque-yos de la gana, ensin malpenes indemnización.
Amigos, griegos, el camín que tenéis per delantre ye mui xodíu ya inciertu. Nunca sal gratis retar a los grandonos, siempres hai que pagar peaxe. Ye igual. Otru sera’l día d’echar cuentes y buscar soluciones, pero la fiesta del día de güei esa nun puen quitávosla. Y lo demás… yá veremos, que como dixo nun sé quién, el futuru nun ta escritu.
