close
Un prestixosu premiu

Un prestixosu premiu

2014-05-29513Visitas

VersonaxesPor tercer vez no que lleva de vida, que nun ye mui llarga, la Editorial Pintar-Pintar acaba ganar el Premiu Nacional a la Edición, na categoría de Lliteratura Infantil y Xuvenil, d’ente «un porrón» d’editoriales de gran prestixu. La obra premiada, publicada n’asturianu y castellán, ye «Versonaxes» / «Versonajes», que recueye unos prestosos poemes pa neños, d’Aurelio Gónzalez Ovies,  colos perguapos dibuxos d’Ester Sánchez. Trátase, entós, d’un album mui completu onde’l diseñu, la maquetación, les illustraciones y el textu, formen un conxuntu unitariu al serviciu del entretenimientu de los rapazos/es. Lo curioso del casu ye que si’l nuestru idioma fuere oficial, el premiu llevaríalu la edición n’asturianu. Al nun ser asina, dán-ylu a la edición en castellán. Un nuevu agraviu comparativu al qu’asisten, impasible l’ademán, los políticos asturianos que nos representen nel Parllamentín. Vergoña-yos tenía que dar que nun podamos participar nos Premios Nacionales Españoles, ellos que son tan «españolistes», porque la nuestra llingua nun tea reconocida oficialmente. En cualquier casu, una Norabona mui grande a les responsables de Pintar-Pintar, les amigues Ángela y Ester, y que sigan trabayando tan bien como hasta agora. Pese a la escasez de perres, de planificación y d’oficialidá. Lo qu’enantes se llamaba: «trabayar pal inglés». Darréu va un pequeñu poema del llibru:

CON FARINA Y MOLDES

Si tenía una pena
o taba mui sola,
facíanos pasteles
coles cenahories,
y pastes d’almendra
grandes y rechonches.
Y ellí desfogaba,
con farina y moldes
y yemes y azucre,
rodiada de potes.

-¿Qué te duel, mamina?
Dinos por qué llores.

Tranquilos, mios neños,
fue al picar cebolles.

Leave a Response