Anunciábase a gaita y tambor el seguru «sorpasso» (otru pallabru de moda) que diba a da-y la coalición Unidos Podemos al PSOE, según toles encuestes de tolos medios. La cosa fue al «resve»: los socialistes dieron un sorpassu a les encuestes y al grupu encabezáu por Pablo Iglesias. D’onde se deduz que les empreses que se dediquen a inventar les encuestes, los vaticinios y los porcentaxes deberíen esapaecer del panorama de les coses series, y pasar a incluyise dientro del apartáu de los chamanes, charlatanes, echadores de cartes, pasadores del agua, lleedores de la mano ya intérpretes de los posos de los cafés. Entovía un minutu enantes de que la realidá principare a poner les coses nel so sitiu, figuraben na parte inferior de la tele los 91 a 95 escaños que-y axudicaben a UP, y los 81 a 85 a los sociates. ¡Amigos, nun disteis una!
Polo demás ablúcame’l trunfu ampliu del PP, non porque nun esperare que volvieren a ganar, sinón pola contundencia del resultáu. Lláma l’atención -y produz verdaderu ascu- l’aumentu d’escaños na Comunidá Valenciana onde la cúpula del partíu ta na cárcel por robu, corrupción y deshonestidá. ¿Qué hai que facer pa que la xente dexe de votate, matar a tu madre…? Con coses asina un empieza a plantease si de verdá ye demócrata, porque nun puedo valorar igual a un d’esos votantes valencianos col mio votu. Non ye chulería, ye una cosa que se llama ética, que ta percima de bandos, colores, gustos y banderes polítiques. Hai coses que nun puen tolerase, y non deben tolerase. Como que s’aplauda y se pidan autógrafos a un futbolista famosu, que defraudó a la caxa de tolos españoles munchos millones de pesetes. ¿Qué mierda de sociedá tamos faciendo, sólo apta pa que focen los gochos celtas?
De magar agora, Unidos Podemos tendrá que se plantegar el porqué del so estancamientu. Una parte nun dependió
d’ellos, con una campaña de los grandes diarios dafechamente a la escontra: El País, El Mundo… Manipulando a la opinión pública con eso de Venezuela y el mieu al «qué vienen los comunistes». Pero otra parte si dependió d’ellos y tendrán que ver si la coincidencia con Izquierda Xunida fue o non acertada, asina como lo del referendum soberanista que, pa mayor Inri, coincidió col referendum del Brexit qu’asustó muncho a la xente y provocó un descalabru bursatil.
El PSOE ta mui contentu porque UP nun los pasaron. Bueno, ye verdá, pero siguen perdiendo votos y escaños y nun tienen pinta de ser relevu gubernamental. Siguen col voto cautivu asturianu y andaluz, pero los vieyos van morriendo y la xente mozo nun va a conformase cola parálisis que lleven dende va munchu tiempu. Salvólos la moderación frente a los sos competidores más a la izquierda.
Los discípulos d’Albert Rivera dieron una imaxe mui probe, anque tamién tán dalgo contentos porque piensen que puen ser llave pa la gobernación, ya igual ye asina. Pero como partíu paez que tocaron techu. Son una segunda edición del PP non marcaos pola corrupción, pero como paez qu’esi tema a la xente nun-y da más, lleven les de perder col «orixinal».
En fin, que paez qu’agora sí va a haber gobiernu, porque toos tán un poco escarmaos. Nun ye’l que yo quixera, pero ye lo que votó la xente. Llueu que nun vengan a llorar los Boabdiles que nun fueron a comportase como paisanos. Amén.
