Yá me fiede un poco tener qu’escribir sobre’l conflictu Árabe-Israelí, agora reducíu a los enfrentamientos xudío-palestinos porque’l restu los paises árabes guarden un prudente silenciu, de magar «les mamaron» abondo na llamada Guerra de los seis díes. Y fiédeme escribir sobre ello porque ye pa repetime, diciendo otra vuelta lo que dixi n’otres ocasiones. Pero ye que tampoco pue ún mirar pa otru llau, mentanto haya civiles inocentes morriendo a un par d’hores d’avión (lo que tarda l’ALSA en llegar a Llión) y sobre too cuando una gran parte d’ellos son neños.
Tendré, pues, que repetir la mio opinión que seguramente nun ye una opinión mui cualificada (nun soi historiador, nin políticu, nin sociólogu, nin…) pero ye la mía y a mi valme. L’Estáu d’Israel, colóse nel llugar qu’agora ocupa por una resolución de la comunidá internacional en 1947, pola que se dixebraba’l territoriu de Palestina en dos metaes, que daríen llugar a dos Estaos, unu xudíu y otru árabe. Tratábase, según se dicía entós, «de dar un Hogar al pueblo judío». Podíen tenelo fecho n’otru cualquier llugar, por exemplu, nun cachu de California que, según los metros cuadraos de territoriu ocuparíen un 5% del total, pero fízose ellí, en Palestina, porque los xudíos reivindicábenlo como antigua patria suya. Claro que los supuestos drechos qu’amosaben sacábenlos de la Biblia, que nun ye precisamente un llibru del que pueda un fiase muncho. El casu fue que la comunidá internacional, cola mala conciencia qu’arrastraba depués del Holocaustu, más los intereses económicos añadíos, llantólos ellí colo que los que vivíen n’aquel sitiu tuvieron qu’integrase o llargar pa otru llugar.
Lo que vien detrás ye conocío. Los paises árabes nun aceutaron de bon grau (nin de malu) la imposición internacional,
y al gritu de: «¡Echalos al mar!», aniciaron una riestra de guerres escontra’l nuevu Estáu que fueron perdiendo una tres otra. Nun sólo eso, sinón que la perda de les guerres traxo consigo tamién una perda de territoriu que pasó a manes de los xudíos que, per otru llau, necesitaben espandise. Y esa necesidá d’espandise nun aparó hasta agora, y nun tien pinta de que vaiga a aparar. Los colonos que se van amestando al nuevu estáu van pidiendo más y más tarrén, y como son votos pa formar los gobiernos, los sucesivos gobernantes van dándo-yoslos, faciendo de los territorios palestinos un verdaderu quesu de gruyere.
El casu ye que’l conflictu ta mui gafu, porque una de les dos partes, la Palestina, entovía nun fue a formar l’Estáu que-y correspondería, con capital en Xerusalén. Y dame la impresión de qu’Israel nun ta mui pol llabor de que lu formen, pese a la «verborrea» de los diplomáticos que nun quieren que la ONU los reconoza, porque dicen que primero hai que falar de paz, nunes conversaciones que nunca lleguen a bon puertu pol tema de los colonos, del retornu de los esiliaos, de la capitalidá en Xerusalén y d’otros cuantos que sedría llargo retafilar.
Asina que, como los palestinos tampoco ye que seyan mancos, anque son probes, y nun se conformen col statu quo, de xemes en cuando vuelven les «escaramuces» nes que siempre paguen el patu los más inocentes. Porque eses «escaramuces» son, en realidá, un «tiru al blancu» per parte d’Israel, qu’executa ensin piedá eso del «asesinatu seleutivu». Que digo yo que nun ye tan seleutivu cuando muerren tantos neños y families civiles. Lo cuál tampoco nun xustifica la testerona actitú de Hamas de provocar los enfrentamientos con esos tiros de «gomeru», que tamién producen muertos (y tolos muertos cuenten) nel otru bandu.
Hai tamién otros motivos «collaterales» que surden agora: la prosimidá de les eleiciones n’Israel, la llucha pol poder ente los palestinos, ente’l más diplomáticu Presidente de l’Autoridá Nacional Palestina, Mahmud Abbas, y los más guerreros representaos pol grupu armáu Hamas, y unes cuentes variables más que nun faen sinón engafentar l’asuntu.
La cosa, como pue vese, tien mala igua. Pero como l’opinar ye llibre, a mí abúltame que si los Estaos Xuníos, principales caltenedores del Estáu d’Israel, se plantaren d’una vez y punxeren «les pistoles» enriba la mesa, la cosa podía tener dalguna solución. Pero, claro, el lobby xudíu n’ USA tien munchu poder, y da munches perres pa les campañes presidenciales, colo que nun va a resultar fácil qu’ Obama, anque lo qu’anunció na otra llexislatura (nesta calló como un afogáu), ponga firme a los xudíos. Tolo contrario, son estos los que lu ponen firme a él. Y asina, a siguir too como ta, cada vuelta más engafentao y morriendo esa probe xente inocente mentanto los que podíen facer dalgo, nun lo faen. Yo veolo asina, pero igual toi enquivocáu.
