Siempres hubo na Europa romántica un gran interés pol mundu máxicu y mitolóxicu escocés, y polos clanes y les sos lluches en munchos casos despiadaes. N’Italia, la ópera tamién se fizo ecu d’esi romanticismu d’época y asina se demuestra nesta «Lucia de Lammermoor», que ta basada na novela de Sir Walter Scott «La novia de Lammermoor». Scott, al que podríemos llamar l’inventor de la novela histórica moderna, como bon escocés, dexó buelga del so nacionalismu románticu en delles de les sos obres y ésta ye una d’elles.
En tou casu, el llibretu d’esta guapísima ópera de Gaetano Donizetti, céntrase cuasi con esclusividá nos amores -imposibles- de dos persones de clanes diferentes. Nun sólo diferentes sinón enfrentaos por años de lluches y muertes. D’ehí qu’esos amores, como na inmortal Romeo y Julieta, fueren dafechamente imposibles. Sábese, amás, que l’hermanu de Lucia, Lord Enrico Ashton, apostare a caballu perdedor nel enfrentamientu políticu ente «un tal» Guillermo y «una tal» María, de los que nun se dan más desplicaciones. Poro, pa congraciase colos vencedores, Enrico tien que casar a la so hermana con Lord Arturo Buklaw, anque too esto nun queda nada claro. El llibretista fue un poco imprecisu, por dicilo de mou suave.
Pero nada d’esto importa demasiao al contemplar esta maraviosa ópera, intensa, dramática hasta prender la
emoción nos espectadores, qu’aguantamos hasta’l final col corazón nun puñu. Esto tamién (o principalmente) debióse a un elencu d’interprétes de munchísimu nivel. Nosotros vimos esta obra nel Teatru Campoamor nuna fecha que se llama «Viernes de Opera», que ye a precios reducíos, y non colos cantantes «principales» sinón cola que podíemos llamar «segunda unidá». Pues bien, nun sé como sería la «primer unidá», pero la nuestra estuvo a un nivel altísimu. Nun creo que pueda cantase una Lucia meyor que lo fizo la soprano catalana Sara Blanch, estraordinaria de voz y xestu, apoyada pola so encantadora presencia física y les sos dotes interpretatives, fizo una «Lucia de Lammermoor» insuperable. Les ovaciones del publicu, durante y al final de la obra asina-y lo reconocieron. Gran carrera tien per delantre. Dicen que la otra soprano qu’interpretó’l papel, l’australiana Jessica Pratt, estuvo escelente. Mui escelente tuvo de ser pa meyorar al de la Blanch que nos deleitó a «los del Viernes». Sólo por ella pagaba la pena asistir al espectáculu.
Al so llau, nel papel del adoráu Edgardo, tuvo’l tenor Alejandro del Cerro que fue de menos a más. Principió un poco floxu, pero a midida que la obra avanzaba garró protagonismu finando a un bon nivel. Tien una voz clara y bien definida y xube con naturalidá ensin forzala demasiao. El malváu hermanu de Lucia, por culpa del que s’entamó tol enguedeyu, corrió a cargu del barítonu Gustavo Castillo que conduzo’l so papel con dignidá, gracies a la so guapa voz y el perfeutu fraséu. Caltuvo la so presencia nun altor mui estimable. Y el baxu Francisco Crespo representó al tutor y confesor de Lucia con aciertu, provistu d’un rexistru de voz que se fizo notar sobre too nes notes más baxes. La escena que cantó col coru, cuando fai pública la noticia de la llocura de Lucia, fue perguapa. En cuantes al propiu coru de la Ópera d’Uviéu, namás dicir que tuvo al nivel al que nos tien avezaos, lo cuál quier dicir que mui altu, lo mesmo que nel aspeutu interpretativu. Y la Orquesta Oviedo Filarmonía zarró un conxuntu interpretativu que nos fizo esfrutar d’una velada dafechamente formidable. Pese a que la representación duró cerca de les tres hores, el tiempu pasónos volando. Nun se pue dicir más. Norabona a tolos que lo llograron.
