Baráxense dellos motivos pa la renuncia/abdicación del Rei Juan Carlos I en favor del so fíu Felipe: la mala salú, el descréitu de la monarquía en xeneral y del rei en particular, los problemes xudiciales de la Casa Real, etc. Lo más llóxico ye que nun seya un solu, sinón una mecia de toos ellos lo qu’impulsó al Borbón a trespasa-y la corona –colo qu’ello conlleva- al so fíu. Por cierto, cola modificación de la llei sálica que beneficia a la so fía primoxénita, Leonor, que podrá ser reina, pero que por nun aplicala enantes perxudicó a la so hermana mayor que debiere ser la reina en vez d’él. Pero, en fin, eso son xareos dinásticos que nun m’interesen.
Lo que quería dicir, y digo, ye qu’agora que vamos tener nuevu rei, un rapaz xoven y de bona planta, principia a comentase en dalgunos “cenáculos” eso de qu’esta ye la hora de “modernizar” la monarquía. D’actualizala y adaptala a los nuevos tiempos. Yá se comentó dalgo pol estilu cuando l’entós heriede del tronu, Felipe, casó con una moza del pueblu, periodista y divorciada. ¡Qué bien! Dixeron les revistes del corazón y les almes cándides amantes del glamour, ta bien modernizar la monarquía.
Pero, digo yo que la monarquía esiste precisamente porque nun ye moderna. Nin lo ye, nin pue selo. La monarquía ye una institución medieval, predemocrática, inxusta nel so propiu orixe porque prima a una persona pol únicu motivu de tener una determinada sangre, y cuya continuidá, como una reliquia del pasáu, pue tener como únicu motivu una tradición, un continuum, siempre que nun pase de ser una figura decorativa. Que nun pinte nada nin tenga nengún poder real. Que seya dalgo dafechamente inútil, como esi xarrón de porzolana que tenemos encima una repisa pero que yá perdió, si dalgún día la tuvo, cualquier utilidá.
De tal manera, los componentes d’eses monarquíes decoratives ya inútiles, tienen que xugar el so papel de 
figurantes, ensin pretender pasar a primeres figures. Y tienen que desendolcar esi papel de mou fiable, ensin querer cambiar el guión. Porque lo que nun pue ser ye que quieran ser como nosotros, homes llibres y democráticos, que nos reximos por unes normes socio-polítiques distintes a les suyes de la sangre. Porque si ellos quieren ser como nosotros, casase con quien quieran, opinar llibremente, salir a tomar copes pela nueche, ¿qué sentíu tienen los privilexos de los que gocien? Si quieren ser como nosotros, que renuncien a esos privilexos, a esos sueldos que-yos pagamos, a esos palacios nos que viven, a esos aforamientos qu’esfruten, a esi estatus social y a tolo demás y que den pasu a otra forma de gobiernu, mandando a la monarquía pol desagüe del váter y camudándose nunos ciudadanos más d’una República electa y democrática. La Monarquía nun tien nada que modernizar. O siguen siendo lo que siempre fueron, o seya, unos profesionales como se diz de la Reina, o que desapaeza. Nun caben términos medios nesti mundu contemporaniu.
