En llugar de soltar un rollu sobre esti importante día de reivindicación feminista, prefiero cuntar una especie d’anéudota que me dixeron l’otru día y qu’espeya, bien a les clares, esa importancia social (y de toa clas) de les muyeres inclusive nesti mundu fechu por y pa los paisanos: «Un día Michelle Obama píde-y al so maríu salir esa nueche a tomar dalgo por Washington, un poco al so aire, ensin escolta nin fisgones. Barak accede y salen a picar dalgo pela ciudá. Entren nuna tabierna y ellí, el dueñu, allégase a onde ta Michelle, da-y un par de besos y salúdala encesamente. Michelle respuende nel mesmu tonu. Cuando’l dueñu se retira, Barak entrúga-y a la so muyer que de qué lu conoz y ella-y diz: «Ye un antiguu compañeru de carrera. Cuando yéremos mozos tuvimos una pequeña rellación, pero llueu conocíte a ti y ehí s’acabó». Barak comenta: «O seya que si nun me hubieres conocío a mí, agora seríes la muyer d’un taberneru». A lo que Michelle retruca: «Si nun te hubiere conocío a ti, él sería’l Presidente de los Estaos Xuníos».
Nota.- Agora’l prósimu pasu qu’ habría que dar ye que pudiere ser una «Michelle Obama» la prósima presidenta de los EE.XX.
