ENTRADA REPETIDA.- El día 28 de xunu, como pue vese na fecha de la cabecera, cuando entovía naide falaba del Ébola nin el mieu s’espurría como agora, publiqué nel blogue esta entrada que, paezme, ta agora de plena actualidá. Repítola equí ensin cambiar nin una coma. Namás añadir que güei pon El Comercio qu’Arcelor Mital tien tráficu de mercancíes, pol puertu del Musel, con Liberia, un de los paises contaxaos. Diz el Gobiernín que’l riesgu ye «improbable». Ya sabemos que «improbable» nun ye lo mesmo que «imposible».
La última epidemia de la enfermedá llamada Ébola vien a amosar la debilidá de les actuales sociedaes modernes, espuestes a los virus, y que viven «nel alambre» ensin tomar les resoluciones afayaíces pa solucionar un tema que, d’estendese, podría causar una hecatombe.
Los americanos, por exemplu, son mui amigos de facer películes tremendistes, nes que terroristes de cualesquier frasca, o naves qu’aporten d’otros mundos, tán preparaes pa contaminar la tierra -sobre too la d’ellos- con virus o radiaciones. Quiciás eso suponga tamién un pelligru: que’l tema se vea como una historia de «ciencia-ficción» y non como una posibilidá real. Pero la posibilidá sí ye real, y tenémosla a les puertes anque camentemos que ta lloñe.
Guinea, Liberia, Sierra Leona y agora Malí, ven espurrise los casos d’Ébola con una velocidá de vértigu. ¿Ta lloñe esa parte del mundu? Cometeríemos un gran erru si lo pensáremos. Nun mundu cambiante, nel que la xente se mueve tanto, en cualquier momentu podemos tener casos de la enfermedá dientro la nuestra casa. Porque ésta ye una malura que principió trespasándose de los esperteyos a los monos y a otros animales selvaxes, y d’estos a los humanos. Pero nesti momentu la tresmisión, per vía de fluídos, yá ye de persona a persona… y sigue avanzando.
En Francia, que caltién rellaciones especiales con Malí, acaben poner l’altor másimu de vixilancia -el p4- nel aeropuertu Charles De Gaulle y lo mesmo ocurre con un país tan llonxanu como Arabia Saudí. Pol so llau, los paises que faen frontera colos afeutaos, tán zarrándo les mesmes. Mentanto esto asocede, namás Mélicos ensin Fronteres y, en menor midida, la Cruz Roxa trabayen nes zones afeutaes. Dos oeneges con voluntarios, pero ensin que los paises ricos del mundu planteguen un verdaderu plan d’erradicación d’unes enfermedaes -talo que ta pasando en Sudamérica col Chagas- que podríen ser fácilmente combatíes con destinar unos pocos de los sos recursos a los paises probes onde esisten. Nunca’l dineru pa Cooperación Internacional fue más escasu, ye como si la cosa nun fuera con ellos. Pues que sepan que tán xugando con fueu. Agora entovía ye tiempu, pero igual dalgún díia la cosa yá nun tenga igua.
