TÍTULU: Las armas y las letras
AUTOR: Andrés Trapiello
Editorial: Ediciones Destino, S.A.
AÑU: 2010 (1ª edición, 1994)
DE IMPRESCINDIBLE LLECTURA.- Esti llibru del autor llionés Andrés Trapiello (Manzaneda de Torío, 1953), lleva por sotítulu Literatura y Guerra Civil (1936-1939) y ye un fondu y estensu percorríu a traviés de la persona y la obra del piñu d’escritores que vivieron, d’una o otra manera, la Guerra Civil española. Y digo que ye fondu, porque Trapiello nun se conforma con detallar unos datos biográficos y bibliográficos d’una riestra pergrande d’escritores de la domina, sinón que tamién los analiza, los xulga, y toma partíu respeuto a ellos. Ye, pues, un llibru polémicu, porque tolo que seya tomar partíu nuna causa, tien de llevantar, a la fuercia, les rocees de los que nun comparten el mesmu puntu de vista. Más, entovía, nunos fechos tán dramáticos como ye una guerra civil y más, otra vez entovía, tratándose d’un estamentu tán discutible y tan polemista como ye’l de los escritores. Toos tenemos los nuestros «bonos» y los nuestros «malos», y a naide nun nos presta que se metan colos que respetamos o defendan a los que refugamos.
Ensin embargu, Trapiello toma esi partíu con un gran conocimientu de causa. Sofitáu, non en opiniones más o menos gratuites, sinón en textos, feches, actuaciones concretes, declaraciones… Ye dicir, en datos oxetivos, comprobables, que podrán gustar o non, pero nun se puen negar. Pese a que l’autor remana un gran balagar d’información, el llibru en nengún momentu se fai pesáu, tolo contrario: la so llectura ye apasionante y ún va siguiendo’l filu del que Trapiello va tirando, talo que’l típicu cestu de zreces que van saliendo enriestraes, pasando ensin solución de continuidá d’unos a otros autores perfeutamente rellacionaos ente sí. L’autor llionés valora de caún estremaes coses: la so calidá lliteraria (al so xuiciu, siempre razonáu, anque pudiere nun compartise), pero penriba de too, la so actitú vital en rellación coles sos declaraciones o les sos opiniones. Asina comprobamos el grau de consecuencia que tuvieron dalgunos escritores y, a la escontra, lo inconsecuentes, tramposos, cobardes o, inclusive, traidores que resultaron otros.
Llóxicamente, Trapiello nun ye totalmente oxetivu. Nótense-y les sos simpatíes personales que, per otru llau, él
tampoco nun trata de tapecer. Pero, inclusive nesos casos, esa simpatía nun lu lleva a escamotear nin dexar de criticar al escritor o a la persona, si lo que fizo o escribió ye merecedor d’ello. Por exemplu, rescampla bien nidiu el cariñu que-y tien a don Antonio Machado, pero non por eso dexa de citar el sonetu que l’autor sevillanu-y dedica a Líster y que contién el famosu versu: «si mi pluma valiera tu pistola…» Juan Ramón Jiménez, Miguel Hernández (del que, ensin embargu, destaca sólo la última parte de la so obra), la valentía del actu final d’ Unamuno… La cobardía de Pérez de Ayala acusando a Azaña de lo qu’a él-y faltaba. El papel de los escritores falanxistes y los que s’allugaron a Franco d’un o otru mou. Por cierto, va unos díes fízose un homenaxe en Cataluña a Josep Pla con presencia asturiana. Hai que saber que Pla fue, ente otres munches coses, espía a favor de Franco.
Podría facese interminable la llista d’escritores recoyíos nel llibru y los comentarios del autor sobro ellos. Paga la pena lleer el llibru y conocelos de primer mano. El volume complétase con una perestensa cantidá de material gráficu (semeyes, cartelos…) y unos índices finales de munchu valir. Por too ello, pa tar d’alcuerdu con elli, o pa criticalu, considero’l llibru d’imprescindible llectura pa tol que quiera conocer el «¿Quién ye quién?» de la lliteratura española, nunos años en que los intelectuales, poles especiales circunstancies que-yos tocó vivir, tuvieron que tomar partíu y amosar la so calidá humana. Y hai, al respeutu, munches sorpreses.
