Si tuviere un poco d’eso que se llama «vergoña torera» hubiere dimitío depués del ridículu de los mundiales, onde fuimos goleaos y dimos una impresión penosa. Falo del Marqués de Del Bosque, claro. Hubo otros seleicionadores que lo ficieron muncho meyor, ya inclusive pasaron a la segunda fase, y dexaron el cargu por non cumplir les espeutatives qu’había. Esti non, garróse al puestu cola connivencia del pelamangos de Villar, un «ningundi» que se cree importante y que como Presidente de la Federación Española de Fútbol fai lo mesmo que facía como centrocampista del Athletic de Bilbao: xugar p’atrás.
Agora vuelven a facer el ridículu nel Campeonatu d’Europa, con un fútbol demodé, queriendo caltener un esquema que, si un día tuvo viabilidá, fue porque aquellos xugadores yeren tan bonos que xugaben ensin entrenador. Los que queden d’aquelles glorioses batalles, naufraguen presa de los años y d’un sistema que non furrula. Daba pena velos andar pel campu frente a una aguerrida Italia que sí sabía a lo que xugaba. Un bloque compactu, con una defensa inespugnable, un centru del campu intelixente y unos contrataques peligrosísimos. Facíame gracia oyer comentar al ínclitu Camachu, rei de de los llugares comunes, gritar: «Mira, mira, al otru llau tán solos Juanfran y Cesc», y cuando llanzaben el balón pa esi llau, el bloque italianu basculaba hacia ellí dexándolos tán arrodiaos como nel otro estremu del campu. ¿Eso nun lo aprendió Camacho depués de tropecientos años d’entrenador? Que-y lo desplique’l seleicionador d’Islandia, que creo que ye carteru o albañil.
Pa más inri, en llugar de dimitir namás finar el partíu o, en casu contrariu, ser cesáu pol Presidente de la Federación, suéltase’l Marqués diciendo qu’agora tien que pensar nel so futuru. A ver lo que va a facer. Como si fuere él el xefe. ¡Pero, coime, si tú yes un empleáu de la federación! En fin, too ello un disparate. Que se vaya d’una vegada’l Marquesín y que traigan a otru qu’entienda un poco de fútbol modernu. El probe Iniesta yá nun da pa regatear a más contrarios.
