Tenía esta pequeña necrolóxica escrita dende que morrió Aute. Nun pude publicala porque col aisllamientu perdí la conexón a internet. Póngola agora, un poco en representación de tolos muertos d’estes feches tan abegoses:
La primer vez qu’oyí canciones de Luis Eduardo Aute fue na voz de Massiel. Aquella cantante que se perdió por ganar. Por ganar Eurovisión con aquello del «La, la, la», desaprovechóse una prestosa voz, potente y dalgo ronca que cantaba canciones como «Rosas en el mar», o «Aleluya nº 1» que llueu supi que yeren d’un paisano que se llamaba Luis Eduardo Aute. Él entovía nun cantaba, namás componía. Pero bien ceo pasó a los escenarios con gran aciertu y asina hasta güei. O meyor hasta esti día, en que nos dexó pa siempres. Un tiu raru, esti Aute, poeta, pintor, compositor, cantante… y tolo facía bien. Yo clasifico les canciones, en xeneral, en dos grandes grupos: les que puedo cantar y les que non. La mayoría de les canciones, vamos llamar, modernes, son «incantables» pa min, y entós nun m’interesen porque, anque paezca mentira, yo canto muncho por casa, pue dicilo la mio muyer. Pero canto a Los Panchos, rancheres, Armando Manzanero, dalgún tango… too del añu’l caldo. Aute yera una esceición, porque podía cantalu. Y amás, siempre-y tuvi un gran respetu dende que compuso aquella de «Al alba», una canción de desamor pero que siempre s’aplicó en memoria de los últimos fusilaos del franquismu, nel añu 1975. La primer versión fue la que cantó Rosa León, a la que queremos muncho por Asturies porque vieno dellos años al «Dia de la Cultura». Y tiempo depués yá la cantó él mésmu. En cualquier casu, quiciás la que más me presta ye una canción mui cenciella que se llama «De alguna manera», que tamién la sentí cantada por Serrat y ye mui guapa. Anque soi un mavea pa esto de los ordenadores, a ver si soi capaz de incluyila nesti blogue como memoria particular a esti bon cantante y, polo que dicen, bon paisano que se llamó Luis Eduardo Aute, que’n paz estea.
