Préstame principiar esta entrada citando a un gran historiador y asturianista, mui poco reconocíu pola sociedá ya inclusive pola propia Universidá, que ye don Juan Ignacio Ruiz de la Peña. Ilustre medievalista, llamentablemente fallecíu va yá un tiempu. Falando de los fechos que definen a una comunidá como un ente indentitariu, el profesor Ruiz de la Peña ponía, penriba de los rasgos culturales, étnicos, socioeconómicos…que-y son propios, «el sentimiento de un particular protagonismo a lo largo del tiempo, asumido por los miembros de esa comunidad y reconocido por las comunidades foráneas que es el que en definitiva hace que (…) una extensión puramente geográfica se transforme en escenario en que mora un grupo humano al que le sucede algo en común y pueda, legítimamente, ser tomado como base de un relato histórico dotado de sentido». Pa añadir más alantre qu’Asturies caltuvo «una personalidad propia» entre’l restu de los pueblos de la corona castellano-leonesa.
Ye cierto que, a lo llargo de la Historia, los asturianos tuvimos mui ñidia esa diferencialidá y caltuvimos un protagonismu propiu frente a los fechos históricos. La propia constitución del Reinu d’Asturies y los doscientos años d’esistencia que tuvo, nos qu’afitó y enanchó’l so territoriu y llevantó una arquiteutura avanzada, llegando a tener rellaciones col gran Carlomagno fue quiciás el nuestru momento cimeru… pero non l’únicu. La declaración de guerra a Napoleón, cuando la Xunta Xeneral se proclamó soberana y unvió embaxadores a Inglaterra, y la tamién autoproclamada soberanía nos meses finales de la Guerra Civil n’Asturies, por parte’l Conseyu Soberanu d’Asturies y Lleón pudieron ser otros momentos nos que, con mayor o menor fortuna, los asturianos asoleyamos la nuestra diferencialidá de forma esplícita.
Ensin embargu, ye cierto que fueron poques veces les que nos arremangamos y punximos enriba la mesa les nuestres cartes pa xugar con elles. A la escontra, la nuestra clase política, dende tiempos inmemoriales, prefirió apuntase al carru castellanu-centralista y escaecer, cuando non condenar, cualquier ñiciu de diferencialidá nun se sabe si por carecer de raigaños o por combayar colos que calteníen el poder en Madrid. Tolo contrario qu’otres comunidaes, qu’aprovecharon la so identidá propia p’algamar un porgüeyu grande frente a los que siempre callamos escondiendo la nuestra.
Saco a rellucir agora too esto porque, tuvo de venir dalgo tan gordo como una pandemia pa que, de dalguna manera, volviéremos a poner en valir la nuestra comunidá como referencia, dientro del Estáu Español. Los asturianos, dientro de les matizaciones llóxiques, sentímonos mui arguyosos de la nuestra actuación nesta llucha escontra’l virus y reivindicámonos frente a los otros. Por primer vez en munchu tiempu, séntimonos protagonistes en dalgo y a la tiesta del país aportando les nuestres singularidaes propies. Atalanto qu’esto va ser poco duradero, y que en cuantes la situación d’alarma y, sobre too, l’amenaza del virus amenorgue, tornaremos a la nuestra actitú de resignación como País. Pero nun ye malo que, anque sea per un curtiu espaciu de tiempu, recordemos quiénes somos y volvamos a reconocenos como una comunidá diferenciada. Ni meyor, nin peor: sólo distinta.
