Acabóse, por fin, la que m’abulta que fue la Lliga de Fútbol más aburría de la historia. Un campeonatu que yá pel mes d’ochobre taba decidíu, pero que tenía que siguir, machaconamente, hasta’l día d’ayeri, 1 de xunu, selmana tres selmana, ensin nengún interés pa los que, como ye’l mio casu, prestábanos esi deporte. Porque, claro, a min que baxe’l Depor o el Zaragoza, o xuegue la UEFA, o como diaños se llame agora, el Málaga o el Rayo, déxame «al pairo». Y eso ye lo que se xugaba nesta lliga, aparte de si el Barsa batía ésti o aquél record, o Mouriño metía la pata más de lo normal, que yá ye abondo.
Y ye que dende va munchu tiempu, eso qu’enantes yera una competición abierta, onde media docena d’equipos lluchaben coldu con coldu dispuestos a ganar el campeonatu, camudóse nun «bipartidismu» peor que en política. Un par d’equipos que gasten millones en fichaxes y que pierden, como muncho, un par de partíos al añu, y un «pelotón de los torpes» onde s’asitia’l restu, pa ver de salvase o algamar dalgún puestucu d’esos que toquen na «pedrea». Y si, como esti añu, al empiezu falla un de los dos «gordos» (que non grandes) acabóse la lliga: ¡menudu aburrimientu!
Yo recuerdo cuando’l Sporting lluchaba por poder ganar la lliga. Nun yera un suañu, yera dalgo real. Y hubo un añu en
que, si nun ye por aquel árbitru qu’echó inxustamente al espléndidu Ferrero, el meyor estranxeru que tuvimos, la cosa tuviere asina-asina: Quedemos los segundos. Pero recuerdo, entovía muncho enantes d’aquello, cuando cuasi nun te daba más que’l Sporting tuviere en Segunda, porque la Primera taba perinteresante, y ganaben la lliga aquel Atlethic de Bilbao de Carmelo, Mauri, Maguregui y Arieta. El Valencia de los asturianos Paquito y Abelardo, con Claramunt. La Real Sociedad de Zamora y Satrústegui, el Atlético de Madrid de Luis y Gárate o el Sevilla de Campanal, Arza o Pepillo, anque, claro, el Barcelona y el Real Madrid siempre andaben perriba. Agora l’únicu interés ye ver si el Barsa algama los 100 puntos, o el Real Madrid supera’l record de goles. ¡Yá podrán!
Y ye que van terminar matando a la pita de los güevos d’oru, con tantu divismu y tanta pila de millones enriba la mesa, sobre too agora que pa la mayoría ye época de vaques esmirriaes. Cunten, amás, cola collaboración de la AFE, la Federación y les televisiones qu’ente toes axuden a estrangular a la pita, con unos horarios estrambóticos que principien un viernes y duren hasta’l llunes y que quiten el pocu interés que tien la xornada, namás pa poder televisar tolos partíos y que les cadenes paguen por ellos. Sacarán munches perres, pero acaben col fútbol y nun digamos yá colos equipos modestos de Segunda, Tercera, Rexonal o xuveniles, que siempre tienen un partíu televisáu como rival pa dir a los sos campos onde sólo queden cuatro «románticos». Llueu que nun se quexen.
¡Y qué dicir del mio probe Sporting, arrastriándose murniamente per esi pozu de la Segunda…! Lo que vi d’ellos fue apavoriante, polo malo, ensin sistema de xuegu, nin tensión na llucha, nin concentración defensiva… Una calamidá, con un entrenador que nun paez mui aptu pa sacanos del furacu. En fin, vamos tener un llargu pasu del desiertu hasta volver a la Primera. Como se diz perequí: «va a vaganos…»
